ЯҢАЛЫКЛАР

Районыбызда матур вакыйга – “Агыйдел дулкыннары” иҗади берләшмәсенә 55 ел тулу бәйрәме  28 ноябрь көнне район мәдәният сараенда билгеләп үтелде. Монда ук Актаныш район җитәкчелеге һәм ТР Язучылар берлеге тарафыннан булдырылган Гамил Афзал исемендәге  премия дә тапшырылды - быел аңа 2011 елда нәшер ителгән “Көлмә кешедән” китабы өчен Фәнзаман Баттал ия булды. Премияне сатирик язучыга Актаныш муниципаль район башлыгы вазифаларын башкаручы Ф.Камаев һәм ТР Язучылар Берлеге рәисе Р.Корбан тапшырдылар.

Район авыл хуҗалыгы һәм азык-төлек идарәсе белгечләре тарафыннан 28 ноябрь көнне Нур Баян исемендәге хуҗалыкта гамәли семинар узды. Хуҗалык рәисләре, баш белгечләре катнашкан бу чарага муниципаль район башлыгы вазифаларын башкаручы Ф.Камаев җитәкчелек итте.

Татарстан Республикасы  Аграр Яшьләр Берләшмәсенең күчмә семинары 23 ноябрь көнне Актанышта, «Яшьлек» МҮдә узды.  Актаныш районыннан  30га якын актив яшь белгеч чарада катнашып, социаль проектлар төзергә өйрәнүдә беренче сабакларын алдылар.

23 ноябрь көнне  Түке авылында берьюлы ике йортта өй туе үткәрелде. Сугыш ветераны толлары Наҗия Газизуллина һәм Саҗидә Салиховаларга “Радуга” төзелеш җәмгыяте яңа йорт ачкычлары тапшырды. Тантанада район башкарма комитеты җитәкчесенең икътисад буенча урынбасары М.Гыйләева катнашты һәм өлкәннәргә җылы тәбрикләүләрен ирештерде.

Билгеле булганча, 25 ноябрь көнне Россиядә Әниләр көнен билгеләп үтәләр. Актанышта әлеге бәйрәм уңаеннан 2012 елда дүртенче, бишенче, алтынчы бәбиләрен алып кайткан әниләр, инвалид  балаларны тәрбияләүче әниләрне, ана капиталы сертификатын алырга хокуклы аналарны, өлкән яшьтәге,  Татарстан Республикасы  һәм Россия Федерациясе атказанган хезмәткәрләрен  хөрмәтләделәр – район үзәгенең тантаналар залына 23 ноябрь көнне гүзәл затларны чакырып, изге эшләре өчен рәхмәт сүзләрен җиткерделәр.

Ярты гасыр иңгә-иң куеп, гомер юлын бергә узган парлар – алтын туйларын каршылаучыларны район күләмендә хөрмәтләү тантанасы Актаныш төбәгендә инде күптән күркәм традициягә әверелде. Ә бүген исә якынлашып килүче Әниләр көне уңаеннан шушы көннәрдә гаилә коруларына 50 ел тулган  7 парның  һәммәсе дә Актанышның тантаналар залында “Пар канатлар” бәйрәменә җыелдылар.

Г. Тукай исемендәге Дәүләт бүләге иясе, Х. К. Андерсен исемендәге Почетлы Дипломга һәм Халык шагыйре дигән олы исемгә лаек булган балалар шагыйре - Ш. Галиевнең тууына 16 ноябрьдә 84 ел тулу уңаеннан, Актанышның 5 санлы “Кояшкай”  балалар бакчасының мәктәпкә әзерлек төркеме кыз-малайлары бүген тәрбияче апалары белән берлектә  шигырь кичәсе уздырдылар.

20 ноябрь көнне Актаныш муниципаль районының башкарма комитет каршындагы балигъ булмаган балалар белән эшләү һәм наркотикларга каршы көрәш комиссияләренең берләштерелгән киңәшмә-утырышы узды. Чараны район башкарма комитеты җитәкчесенең социаль мәсьәләләр буенча урынбасары Л.Шамсунова алып барды.

1 декабрьдә Актанышның район  Мәдәният сараенда Хореография һәм фольклор коллективларының татар халык биюе һәм этнографик бию буенча “Шома бас!” республика смотр-конкурсының зона туры узачак.