ЯҢАЛЫКЛАР
Зәй шәһәрендә 16-20 январь көннәрендә IX укучылар Спартакиадасы кысаларында чаңгыда узышу буенча финал ярышлары үтте. Актаныш яшь спортчылары остазлары Г.Мансуров җитәкчелегендә биредә мәртәбәле II урынны яулап кайттылар.
Районыбыз мәгариф хезмәткәрләре арасында 19 январь көнне кышкы спорт төрләре буенча Спартакиада узды. Бәйгеләр “Бүләк” чаңгы базасында чаңгыда узышу белән башланып китеп, Балалар иҗат үзәгендә өстәл теннисы һәм “Иман” спорт комплексында кул көрәше һәм аркан тартыш белән дәвам итте.
Район авыл хуҗалыгы һәм азык-төлек идарәсе белгечләре тарафыннан бүген «Нур Баян исемендәге» хуҗалыкта гамәли семинар узды. Хуҗалыкларның бозау караудагы терлекчеләре, мал табиблары, зоотехниклар катнашкан бу чарага авыл хуҗалыгы һәм азык-төлек идарәсе башлыгы Д.Харисов җитәкчелек итте.
ТР Гадәттән тыш хәлләр министрлыгының Актаныш муниципаль районы буенча идарәсенең еллык эшчәнлегенә 15 январь көнне “Яшьлек” мәдәни үзәгендә йомгак ясалды. Чарада полковник, “ТР буенча янгынга каршы 15 нче федераль хезмәте отряды” ДУ башлыгы М.А.Иванов, район Советы рәисе урынбасары И.Ш.Бариев, район башкарма комитеты җитәкчесе урынбасары И.Э.Фәттахов катнаштылар.
«ФОПРОСТ» яшьләр хәрәктендә исәптә торучы балалардан һәм “Яшьлек” мәдәни үзәге белгечләреннән бер төркем 11 гынварь көнне Актаныш авылында яшәүче, физик мөмкинлекләре чикләнгән Алмаз Газетдиновны искечә Яңа ел бәйрәме белән тәбрикләп, аңа Кыш бабай бүләкләрен тапшырып кайттылар.
Сессияләрен тәмамлап, кышкы ялга кайткан студентларны җыеп, район күләмендә матур чара үткәрү, район башлыгының алар белән очрашып, ике якны да кызыксындырган сорауларны уртага салып сөйләшү районыбызда инде традициягә әверелгән. 2013 елда узачак Универсиадага бәйле рәвештә Казан студентлары сессияләрен иртәрәк тәмамлады, шуңа күрә, быел әлеге чара бераз иртәрәк- 10 январь көнне оештырылды.
Уку алдынгылары, фән олимпиадаларында җиңүчеләр, спортта яхшы күрсәткечләргә ирешкәннәр – бер сүз белән әйткәндә, мәктәп тормышында кайнап яшәүче актив укучыларны ел саен район башлыгы чыршысына дәшәләр. Анда катнашу – зур мәртәбә, район башлыгының үз кулларыннан "Рәхмәт хаты" алу – һәр балага карата зур хөрмәт һәм игътибар дигән сүз.