ЯҢАЛЫКЛАР

Районыбызда һәр яңа ел башында борылып артка карап, узган елгы эшчәнлеккә нәтиҗәләр ясау, хезмәт уңганнарын бәяләү, хөрмәтләү максатыннан алдынгылар слеты уздырыла. Бүген әлеге күркәм чара район мәдәният сараенда үтте.  

Чишмә авылында яшәүче Зөһедия Зиятдин кызы Закировага 21 январь көнне 95 яшь тулды. Аны олы юбилее белән район башлыгы вазифаларын башкаручы Фаил Камаев исеменнән район башкарма комитеты җитәкчесе урынбасары Ландыш Шәмсунова тәбрикләде һәм Зөһедия әбигә РФ Президенты В.Путинның Котлау хатын, район хакимиятенең бүләген тапшырды.

Тарих  буенча Бөтенроссия укучылар фән олимпиадасының региональ этабында  Актаныш гуманитар  гимназия-интернатының IX сыйныф  укучысы Айдар Шәйхин (укытучысы Миләүшә Абдуллина) җиңүче дип табылды.

Район башкарма комитеты яшьләр белән эшләү, спорт һәм туризм бүлеге район оешма-предприятиеләре һәм учреждениеләре хезмәткәрләренең кышкы спорт төрләре буенча Спартакиадасы кысаларында өстәл теннисы һәм шахмат буенча Чемпионат уздырылу турында хәбәр итә.

“Лачын” боз спорт сараенда 19 январь көнне 1998 елгы яшүсмерләр арасында Татарстан Республикасы беренчелегенә хоккей ярышлары узды. Боз өстендә Актанышның “Лачын” һәм Лениногорск шәһәренең “Нефтяник” төркемнәре очрашты. Уен килгән көндәшләр файдасына, 10:2 исәбе белән төгәлләнде.

А.В.Тарасов исемендәге “Алтын алка” клубы призына  Бөтенроссия яшь хоккейчылары бәйгеләренең Республика турнирында Актанышның  2002 елгы “Лачын” төркеме быел беренче мәртәбә үзен сынап карады һәм сынатмады.

Зәй шәһәрендә 16-20 январь көннәрендә  IX укучылар Спартакиадасы кысаларында  чаңгыда узышу буенча  финал ярышлары үтте. Актаныш яшь спортчылары остазлары Г.Мансуров җитәкчелегендә биредә мәртәбәле II урынны яулап кайттылар.

Районыбыз мәгариф хезмәткәрләре арасында 19 январь көнне кышкы спорт төрләре буенча Спартакиада узды. Бәйгеләр “Бүләк” чаңгы базасында чаңгыда узышу белән башланып китеп, Балалар иҗат үзәгендә өстәл теннисы һәм “Иман” спорт комплексында кул көрәше һәм аркан тартыш белән дәвам итте.