ЯҢАЛЫКЛАР
Кышкы ярминкәне хуҗалыклар арасындагы тройкалар бәйгесендә катнашучы атлар парады дәвам итте.
Матур итеп бизәлгән атлар район хакимияте бинасы каршына килеп туктады. Бәйрәмгә җыелган халык быел да тройкалар парадын яратып карады. Теләге булганнарга атларга утырып йөрү мөмкинлеге дә бар иде.
Тройкаларның бизәлешенә, утырып йөрү җайланмасының уңайлылыгына карап урыннар чыгарылды. Нәтиҗәләрне Актаныш муниципаль районы авыл хуҗалыгы идарәсе җитәкчесе Дәниф Харисов ясады: 1 урын - «Ташкын» ҖЧҖ ; 2 урын - «Чишмә» агрофирмасы; 3 урын - «Чишмә» ҖЧҖ.
Бәйрәм ярминкәсе быел 30 декабрьдә аеруча да истә калырлык узды. Авыл җирлекләре, мәдәният хезмәткәрләре белән, мәгариф оешмалары, оешма-предприятиеләр үз сәүдә нокталарында әкият геройлары булып киенеп, театраль тамаша, мәзәкләр аша үзләре әзерләгән яңа ел товарларын саттылар. Яңа ел төсмере белән бизәлгән, бәйләнгән һәм тегелгән киемнәр, аш-су ризыклары, авылларның бренд эшләнмәләре – һәммәсе әкияти рухта иде. Һәр сату ноктасына әкияти исем бирелгән. Шунда ук кайнар чәй эчеп, яңа пешкән коймактан да авыз итәргә мөмкин. Яңа ел табынына җаның ни тели – барысын да сайлап ал!
Кыш бабайлар һәм Кар кызлары парады, бизәлгән тройка атлар – һәммәсе дә ярминкәгә килүче актанышлылар, кайткан кунаклар күңеленә хуш килде.
Актанышта “Әкияти ярминкә”, Кыш бабайлар парады, тройкалар ярышы узды - фоторепортаж.
29 декабрь көнне Актаныш районының "Бүләк" чаңгы трассасында Кыш Бабай бүләгенә чаңгы ярышы булып узды.
Бәйгенең җиңүчеләре һәм призлы урын алучылар.
2007 елгылар һәм яшьрәкләр, кызлар: 1 урын – Язилә Закирҗанова (АСОШ №1), 2 урын – Алия Сәлахова (АСОШ №1), 3 урын – Юлиана Мохитова (АСОШ №2); егетләр: 1 урын – Ринат Гәрәев (АСОШ №1), 2 урын - Әмир Язитов (АСОШ №2), 3 урын – Эмиль Мансуров (АСОШ №2).
2005 и 2006 елгылар, кызлар: 1 урын – Резеда Басырова (АСОШ №1), 2 урын – Лиана Латыйпова (АСОШ №2), 3 урын – Гөлия Хамадуллина (АСОШ №2); егетләр: 1 урын - Раушан Әхмәтов (Теләкәй), 2 урын – Искәндәр Могътазиров (АСОШ №1), 3 урын – Искәндәр Ибраһимов (АСОШ №1).
2003 и 2004 елгылар, кызлар: 1 урын – Регина Минһаҗева (АСОШ №1), 2 урын – Гүзәл Хәмидуллина (АСОШ №2), 3 урын – Мәрьям Әгъзамова (АСОШ №2); егетләр: 1 урын – Илшат Шакиров (АСОШ №2), 2 урын – Айназ Имамразыев (АСОШ №2), 3 урын – Илназ Вәҗетдинов (Пучы).
2001 и 2002 елгылар, кызлар: 1 урын – Тансылу Таҗиева (АСОШ №2), 2 урын – Ирина Муллаянова (АСОШ №2); егетләр: 1 урын – Илнур Хасанов (АСОШ №2); 2 урын – Данил Гайсин (АСОШ №1), 3 урын – Илгизәр Мохитов (АСОШ №2).
Ветераннар. Хатын-кызлар: 1 урын – Айгөл Дәүләтова (Пучы), 2 урын – Алсу Гикрамина (Актаныш); ир-атлар: 1 урын – Равил Хаҗиев, (Актаныш), 2 урын – Данил Кирамов (Актаныш), 3 урын – Ирек Мөхәмәтов (Актаныш).
Бүген – 28 декабрьдә “Яшьлек” мәдәни үзәгендә “Ел укытучысы” республика бәйгесенең муниципаль этабына нәтиҗә ясалды - җиңүчеләр бүләкләнде.
“Ел укытучысы” бәйгесенең муниципаль этабында 29 мәктәптән 52 укытучы катнашты. Алар бәйге кысаларында үзләренең эш тәҗрибәләре белән уртаклаштылар, укыту методикасы һәм һөнәри осталыкларын күрсәтү буенча белемнәрен арттырдылар, эзләнделәр, иҗат иттеләр.
Быелгы бәйгенең үзенчәлекле сынау-биреме - 25 декабрьдә конкурста катнашучылар Актаныш район башлыгы Энгель Фәттахов, Иннополис лицее директоры урынбасары, “Ел укытучысы – 2014” россиякүләм бәйгенең абсолют җиңүчесе Алла Николаевна Головенькина белән түгәрәк өстәл артында сөйләшүдә катнаштылар, мәгариф өлкәсенә кагылышлы көнүзәк мәсьәләләр хакында фикер алыштылар.
Җиңүчеләрне бүген район мәгариф идарәсе җитәкчесе Нәфисә Шәфыйкова, район башкарма комитеты җитәкчесенең социаль мәсьәләләр буенча урынбасары Ләйсән Нурлыева, район башлыгы Энгель Фәттахов тәбрикләде.
Актанышта узган "Ел укытучысы" конкурсының муниципаль этабы җиңүчеләре - фоторепортаж.
28 декабрьдә – Яңа ел алдыннан, Актанышның Нөркә бистәсендә модульле чаңгы базасы ачылды. Ачылу тантанасында район башлыгы Энгель Нәвап улы Фәттахов катнашты. Чаңгы базасы - бүген тантаналы ачылучы өченче объект.
Республиканың максатчан программалары ярдәмендә Актанышның социаль йөзе үзгәрә. Яңа төзелешләр башкарыла, яңа объектлар сафка баса. Республика максатчан программаларын районга җәлеп итүдә актанышлыларның төрле өлкәдә актив һәм нәтиҗәле эшләүләре дә мөһим фактор булып тора. Үзенең чыгышында район башлыгы Энгель Фәттахов актанышлыларга, төзүчеләргә һәм безнең хезмәтебезне югары бәяләп, ышаныч белдереп, финанс мөмкинлекләре тудырганнары өчен Татарстан Республикасы җитәкчесе Рөстәм Нургали улы Миңнехановка һәм аның командасына шәхсән үзенең һәм актанышлылар исеменнән рәхмәтен белдерде.
Актанышлылар хәзер Бүләк һәм Нөркә урманнарындагы чаңгы юлында чаңгыда шуа алачак. Яңа ел бәйрәмнәрендә ике чаңгы трассасында да ярышлар үтәчәк. Гаилә белән дә сәламәтлеккә файдалы актив ял белән шөгыльләнү өчен уңайлы итеп эшләнгән трассалар.
Нөркә бистәсендәге модульле чаңгы базасында киенү, бәдрәфләр, душ бүлмәләре, тренерлар, чаңгыны саклау һәм хезмәт күрсәтү өчен бүлмәләр, 100 комплект чаңгы экипировкасы, Кар чанасы һәм аны саклау өчен бина каралган. Бер үк вакытта анда 30лап кеше булырга мөмкин. Бу - күп функцияле объект, кар булмаган чорда аны йөгерү, велосипедта йөрү һәм чаңгыда шуу, шулай ук ГТО нормаларын тапшыру өчен куллану мөмкин.
Тантанада район башлыгы Энгель Нәвап улы, Россия спорт министрының 153 карары нигезендә нигезендә, Илфат Каюм улы Иманаевка ГТО ның тугызынчы баскычы алтын билгесен тапшырды.
Тантаналы чарада район башлыгы Э.Н.Фәттахов, ТР сәламәтлек саклау министрлыгының Яр Чаллы шәһәре буенча сәламәтлек саклау идарәсе җитәкчесе урынбасары А. Ә. Борханова, район үзәк хастаханәсе баш табибы Айдар Хаев, авыл халкы катнашты.
Актаныш районында модульле фельдшер-акушерлык пункты төзү программасы нигезендә беренче шундый бина 2012 елда Куян авылы халкына хезмәт күрсәтә башлаган иде.
Алты ел эчендә Шәрип, Югары Яхшый, Чат, Чалманарат, Әгъбәс, Чөгәнә, Иске Богады, Киров авыллары заманча җиһазланган сәламәтләндерү учреждениеләреннән файдалану бәхетенә иреште.
Әҗәкүл авылы район үзәгеннән алты чакрым ераклыкта урнашкан. Биредә 327 кеше исәпләнә, шуларның 59ы пенсионер, 182се - эш яшендәгеләр.
Әҗәкүлдә ачылган заманча модульле фельдшер-акушерлык пунктында фельдшер, смотровой бүлмәләреннән тыш, прививка ясау, медицина коралларын стерилизацияләү, гардероб, даруларны махсус саклау бүлмәләре дә бар. Бинада шулай ук су кертелгән, бәдрәф урнаштырылган. Актаныш районындагы әлеге ФАП видеокүзәтү җайланмасы белән дә җиһазландырылган.
28 декабрьдә Актанышта капиталь төзекләндерүдән соң поликлиника һәм хатын-кызлар консультациясе үз ишекләрен ачты.
Әлеге яңарыш Татарстан Республикасы Министрлар кабинетының 2017 елда дөнья күргән карары нигезендә тормышка ашырылды. Агымдагы елда хастаханәдә хатын-кызлар консультациясе дә яңартылган бинада, яңа медицина җиһазлары, мебель, инвентарь белән хезмәт күрсәтә башлады.
Киң масштаблы төзекләндерү кысаларында поликлиникада җылылык системасы, аны үткәрү трассасы, кайнар һәм салкын су белән тәэмин итү коммуникацияләре тулысынча алыштырылды. Биналарның эче танымаслык дәрәҗәдә үзгәрде. Авырулар өчен холл барлыкка килде. Поликлиника өлешенә - яңа ренгент аппараты, хатын-кызлар консультациясенә автоматлаштырылган кардиограф урнаштырылды. Әлеге эшләрне башкарып чыгу өчен республика тарафыннан 50 миллион сумнан артык финанс ярдәме бүлеп бирелде. Районның Равил Ярмиев җитәкчелегендәге “Газстройсервис” оешмасы исә, сыйфатлы ремонт эшләрен башкарып чыкты.
Төзекләндерү барышында һәркемгә уңайлы шартлар булдыруны күздә тоткан “Дустанә поликлиника – Татарстан стандарты” дип исемләнгән проект гамәлгә куелды.
Бүген Актаныш поликлиникасын файдалануга тапшыру мизгелләре тантаналы төстә оештырылып, чарада район башлыгы Э.Н. Фәттахов, ТР сәламәтлек саклау министрлыгының Яр Чаллы шәһәре буенча сәламәтлек саклау идарәсе җитәкчесе урынбасары А.Ә. Борханова, үзәк хастаханәнең баш табибы А.Р. Хаев катнашты. Халык өчен бик мөһим объектны ачу мизгелләренә райондашларыбыз да битараф калмаган иде.
“Чишмә” агрофирмасы идарәсе һәм профсоюз комитеты быел да күркәм традицияне дәвам итеп, 26 декабрь көнне Меңнәр клубында Яңа ел бәйрәме үткәрде. Чишмә һәм Меңнәр авыллары балалары бик теләп һәм яратып “Шрек һәм аның дусларының яңа ел маҗаралары” тамашасын – район балалар иҗаты хезмәткәрләре чыгышын карады.
Быелгы бәйрәмне балалар сагынып көтеп алды, узган елгы бәйрәм бүләкләре, кызыклы уеннар алар күңелендә ел дәвамында сакланды. Юмарт Кыш бабай һәм шаян Кар кызы белән алар бергәләп төрле уеннарда катнаштылар, җырладылар, шигырь сөйләделәр. Һәр катнашучыга Кыш бабай бүләкләрен дә кызганмады.