ЯҢАЛЫКЛАР

Актаныш район Советының  дүртенче  чакырылыш  дүртенче   утырышы ришвәтчелекне булдырмауда һәм ришвәтчелеккә каршы торуда район җирлегендә алыр барылган эшчәнлеккә багышланды.

Җирле үзидарә органнары эшендә коррупцион куркынычларны булдырмау турында Татарстан Республикасы Президентының Коррупциягә каршы сәясәт мәсьәләләре идарәсенең коррупциягә каршы мониторинг бүлеге баш киңәшчесе Александр Лохотской туры элемтәдә видеокүпер аша чыгыш ясады.

5 –7 декабрь көннәрендә Идел буе физик культура академиясе базасында көрәш буенча Россия чемпионаты узды. Чемпионатта Татарстан данын узган ел республика чемпионатында һәм быел Муса Җәлил турнирында җиңү яулаган көрәшчеләр яклады. Ярышларда Татарстан егетләренә тиңнәр табылмады.

Россия чемпионаты нәтиҗәләре буенча, киләсе елга узачак дөнья чемпионатында, Россия командасы данын яклаячак көрәшчеләр ачыкланырга тиеш иде. Ун үлчәүнең тугызында җиңү яулап, Татарстан егетләре бүген үк үз урыннарын алып куйды дияргә була.

Җиңүчеләр арасында Раббани Нургалиев, Илнар Закиров, Динар Кәримуллин, Рамил Синякаев, Ренас Кәлимуллин, Ранис Галимуллин, Илнар Галимов, Раил Нургалиев, Муса Галләмов, Фәрхәт Фәйзуллин  кебек көрәшчеләребез бар.

Шунысы сөенечле, райондашыбыз Раббани Нургалиев көрәш буенча Россия чемпионатында дәрәҗәле беренче урынга лаек булды. Ул 60 килограмм авырлыкта җиңүче булып танылды.

Раббани Нургаливны ихлас күңелдән барлык Актаныш районы халкы исеменнән тәбрик итәбез! Алга таба да уңышлар телибез!

Дәүләт Думасы депутаты, Дәүләт Думасының Икътисадый сәясәт, сәнәгать, инновацион үсеш һәм эшкуарлык комитеты рәисе урынбасары, «Бердәм Россия» фракциясе әгъзасы Әлфия Когогина Чаллы һәм Актаныш районында даруханәләрне дарулар белән тәэмин итүгә кагылышлы  вәзгыять белән танышты.

Татарстан Республикасы Дәүләт алкоголь инспекциясенең Яр Чаллы территориаль органы эчке базарны үстерү һәм координацияләү бүлегенә Яр Чаллы шәһәрендә яшәүче бер ир-ат автошиналар сату кагыйдәләре турында сорау белән мөрәҗәгать итте. Ул үзенең «тимер аты» өчен аяк киеме сатып алырга булган. Кибет сатучысыннан шиннарны маркировкалау уңаеннан ачык җавап ишетмәгән. Бу сорау белән ул территориаль орган белгечләренә мөрәҗәгать итте, анда аңа түбәндәгеләрне аңлаттылар.

2020 елның 1 ноябреннән Россиядә автомашиналар һәм автопокрышкалар белән сәүдә итүнең яңа кагыйдәләре кертелә: маркировкаланган товар белән генә сату итәргә була. 2020 елның 15 декабреннән маркировкаланмаган шиннар сату һәм аларны әйләнештән чыгару мөмкин түгел. Үзгәрешләр сатучыларга, шиномонтаж остаханәләре һәм ремонт станцияләре хуҗаларына кагыла.

8 декабрьдә 7.20 сәгатьтә «Татарстан радиосы» нда «Яңа көн» программасы чыгачак, анда Татарстан Росреестры һәм Кадастр палатасы экспертлары катнашачак.

Узган атнада Федерация Советы «дача амнистиясен» биш елга — 2026 елның 1 мартына кадәр озайта торган законны хуплады. Күчемсез милекне рәсмиләштерүнең яңа гадиләштерелгән тәртибенең нечкәлекләре турында Татарстан Росреестрының физик затларның күчемсез милеген дәүләт теркәве бүлеге башлыгы Энҗе Мөхәммәтгалиева һәм ТР буенча Кадастр палатасы директоры урынбасары Ләйсән Рәхмәтуллина сөйләделәр.

КПРФ ҮК ның "Татарстан АССР төзелүгә 100 ел " истәлек медале белән татар көрәшен үстерүгә лаеклы өлеш кертүче райондашларыбыз бүләкләнде.

Гөлнара Сәяф кызы Мортазина, Айнур Илфат улы Әнвәров, Фәндил Мөнәвир улы Фәррахов, Мәгъсүп Мәгъфүрҗан улы Әхтәмов, Муллаян Әскать улы Исламовка юбилей медальләрен КПРФның Актаныш районы башлангыч оешмасының 1 нче секретаре Мөнир Газиз улы Гомәров тапшырды.

5 декабрьдә Актанышта күп тапкырлар Сабантуй батыры, РСФСРның спорт остасы, ТАССР чемпионы, М. Җәлил турниры җиңүчесе Илфат Әнвәров истәлегенә яшүсмерләр арасында көрәш бәйгесе узды.

Татарстан Республикасы буенча Росреестр идарәсе җитәкчесе урынбасары Линар Гатин аңлатканча, яңа елдан, тәртип буенча, геодезик пунктка зыян килгән яки юк ителгән очракта, җир участогы милекчесе 15 календарь көн эчендә әлеге факт ачыкланганнан соң, Татарстан Росреестрына тиешле мәгълүмат җибәрергә тиеш. Бу хакта шулай ук геодезия һәм картографик эшләр башкаручы затларга хәбәр итәргә тиеш. Алар моны 15 көн дәвамында кыр геодезия һәм картографик эшләр тәмамланганнан соң эшләргә тиеш. Белешмәләр, үткәрелә торган геодезия һәм картографик эшләр санына карамастан, бер тапкыр хәбәр ителә.

Татарстан Республикасы президенты каршындагы “Татар телен саклау һәм үстерү мәсьәләләре” комиссиясе республиканың барлык мәктәпләре һәм балалар бакчалары арасында “Туган телдә белем һәм тәрбия бирүне оештыручы иң яхшы мәктәп һәм балалар бакчасы” бәйгесен игълан иткән иде. Актаныш авылындагы “Гомуми үсеш бирүче 2 нче балалар бакчасы” “Туган телдә белем һәм тәрбия бирүне иң яхшы оештыра торган иң яхшы егерме балалар бакчасы” исемлегенә керде.

4 декабрьдә “Мәгариф” журналы “Тарих дәресе:ТАССРның 100 еллыгы”, “Яшел бишек”, “И мөкатдәс моңлы сазым”, “Федераль дәүләт стандартлары буенча иң яхшы дәрес” конкурсларына йомгак ясады һәм җиңүчеләрне тантаналы рәвештә бүләкләде. Конкурсларда бик күп укытучылар катнашты, призлы урыннарны 32 белгеч алды.

Актаныш кадет интернат-мәктәбенең информатика һәм математика укытучысы Маликов Илназ Фәнис улы "Мәгариф" журналы редакциясенең "Минем ФГОС буенча иң яхшы дәресем" дигән һөнәри осталык конкурсында "Робототехника" номинациясендә җиңүче булды, Диплом һәм кыйммәтле призлар белән бүләкләнде.

Илназ Фәнис улын котлыйбыз һәм киләчәктә дә уңышлар телибез!