ЯҢАЛЫКЛАР

Актанышта 2021 елның беренче баласы 2 гыйнвар көнне дөньяга аваз салган иде. Ир балага әти-әнисе Илдан дип исем кушты. 7 гыйнварда Илдан туган нигездә беренче авазын салды. Яңа Әлемнең Насыйповлар гаиләсендә беренче булып туган сабый Алинәгә - әни, Илвирга әти булу бәхетен бүләк итте. Бала тудыру йортында Илданны һәм Алинәне бәхетле әти, ике якның да дәү әни, дәү әтиләре каршы алды. ЗАГС бүлеге җитәкчесе Гөлфинә Мөхәмәдиева Илданга туу турында таныклык, ТР Президенты Рөстәм Миңнехановның тәбрикләвен, районның истәлек бүләген тапшырды.

Узган 2020 елдан районда 190 бала туган булса, быел сабыйларыбыз тагын да күбрәк тусын.

Бәхетле, тигез гаиләләрдә алтын канатлы булып үссеннәр, сәламәт булсыннар.

 Бүген район Советы, башкарма комитетында эшләүче җитәкчеләр, белгечләр сәламәт яшәү ункөнлегенә кушылды.

   "Бүләк" чаңгы базасында шәхси беренчелек өчен чаңгы ярышы узды. Өлкән ир-егетләр арасында I урында Актаныш муниципаль районы башлыгы Энгель Фәттахов, II урында район мәгариф идарәсеннән Айрат Кәрамов, III урында комендант Әбүгали Әхмәтгалиев.  
     Яшьләр арасында I урында яшьләр бүлеге җитәкчесе Назил Латыйпов, II урында район Советы аппараты җитәкчесе Илшат Вахитов, III урында юридик бүлек җитәкчесе Дилфат Сәлимов.
      Хатын-кызлар арасында җиңүче- массакүләм мәгълүмат чаралары белән эшләү бүлге җитәкчесе Ләйсән Тимерова.

Актанышны данлы иткән изге төшенчәләр бар: алар арасында Актаныш игенчесе һәм Актаныш көрәшчесе дигәннәрен нык саклый бүгенге яшьләр,  Аллага шөкер, буыннан буынга күчә барган көрәш серләре югалмый. Шуңа күрәдерме Актанышта Яңа ел яллары вакытында узган көрәш ярышына катнашучылар саны бермә-бер күп булды. Кыш бабай призына оештырылган бил алыш ике көн дәвам итте. 93 укучы унике үлчәү авырлыгында үз көчләрен сынады. Зурлар өч категориядә: 65 килограмм авырлыкта, 80 килограмм авырлыктагылар һәм 80 килограммнан югары үлчәмдә көрәште. Исемле көрәшчеләрнең бер мәйданга җыелуы көрәш бәйгесен тагы да абруйлы итте. Көрәш чемпионатына Татарстан, Россиякүләм бәйгеләрдә җиңү яулаган Раббани Нургалиев, Искәндәр Мортазин, Фарис Хуҗин кебек көрәшчеләр чакырылган иде.  Татар милли көрәш тарихында үз исемнәрен булдырган Актаныш егетләре әле генә келәм серләренә төшенә башлаган малайларга үзара көрәшеп осталыкта мастер-класс күрсәттеләр. Актаныш муниципаль районы башлыгы Энгель Фәттахов яшьләрне бу батырлардан үрнәк алырга чакырды.

Актанышта Кыш Бабай призына мәктәп укучылары арасында татарча көрәш турниры ачылды. Ярышлар ике көн дәвамында барачак. Көрәш мизгелләрен күзәтү, җанату өчен "Батыр" спорт комплексына рәхим итегез, райондашлар.

Турнир ачылу тантанасыннан безнең фотомизгелләр.

Актанышта Кыш Бабай призына мәгариф хезмәткәрләре чаңгы эстафетасында узышты. Һәр командадан ике ир-ат һәм ике хатын-кыз җиңү өчен чаңгы юлында техниканы дөрес кулланып, өлгерлек күрсәтте. Мәктәп командалары бик актив булды. Тугызьеллык мәктәпләр арасында - 18, унберьеллык мәктәпләр арасында 8 команда катнашып, Кыш Бабай призын отуда үрнәк күрсәтте.

Көрәш ярышында унике үлчәү авырлыгындагы иң көчле егетләр ачыкланачак, катнашучылар күп булганга бәйге ике көн дәвам итә. Бүләкләр саллы, дип вәгъдә итә оештыручылар. Яңа елның тәүге көрәш ярышына иганәчеләр ярдәмне мулдан әзерләгән. Төп спонсорларның берсе-“Таң” хуҗалыгы рәисе Рафис Миңнеханов ярышларны хөкемдарлар белән бергә күзәтә.

     Бүген “Батыр” спорткомплексында мәктәп укучылары арасында Кыш бабай призына көрәш бәйгесе  башланып китте. Милли көрәш ярышының ачылу тантанасында Актаныш муниципаль районы башлыгы Энгель Фәттахов катнашты. Энгель Нәвап улы Актаныш келәмендә тәрбияләнгән, хәзер Рәсәйкүләм билгеле чемпионнар Раббани Нургалиев, Искәндәр Мортазин, Фарис Хуҗиннарны яшь көрәшчеләргә үрнәк итеп куйды. Татарстан Республикасы чемпионатында Актаныш командасы составында чыгыш ясап, 60 кг үлчәмдә бронза призер булган  Раббани Нургалиевка һәм 90 кг авырлыкта шулай ук бронза медальгә лаек Фарис Хуҗиннарга рәхмәт белдереп, акчалата бүләкләр тапшырды.

Хөрмәтле тыл ветераны Мөхтәрәмә Фатыйх кызын олуг юбилее белән район Советы аппараты җитәкчесе Илшат Вахитов котлады. Теләкәй авылының ак әбисенә Россия президенты Владимир Путинның котлау хаты белән бергә Актаныш муниципаль районы башлыгы Энгель Фәттаховның тәбрикнамәсен, күчтәнәчләрен тапшырды.

Татарстан Республикасы территориясендә метеорологик күренешләрнең интенсивлыгы турында консультация-кисәтү.

      Яңа ел бәйрәмнәрендә чыгарыла торган чүп күләме берничә тапкырга артты. «ГРИНТА»ның төбәк операторы каты көнкүреш калдыкларын чыгаруны контрольдә тотуны көчәйтте һәм линиягә өстәмә махсус техника чыгарды.

        Чүп-чар җыю техникасы өчен киртәләр тудырмас өчен, район халкы автотранспорт чараларын контейнер мәйданчыклары һәм чүп-чар контейнерлары янында калдырмауларын сорый.

        Гражданнар мөрәҗәгатьләренә даими контроль һәм оператив җавап бирү өчен 1-10 гыйнварда кайнар линиянең дежур операторлары билгеләнде.

Актаныш районында дежур диспетчерларның контакт телефоннары:
8 906 116 39 03 (1, 4, 7, 10 гыйнвар)
8 906 116 50 11 (2, 5, 8 гыйнвар)
8 906 166 50 47 (3, 6, 9 гыйнвар)