ЯҢАЛЫКЛАР

Көн саен Татарстан Республикасы буенча Росреестр идарәсенә күчемсез милек белән исәп-теркәү эшләрен башкаруга якынча ике мең ярым гариза килә, шуларның 300 дән артыгы - ипотеканы теркәүгә, шул исәптән ташламалы шартларда.

Татарстан Республикасы буенча Росреестр Идарәсе тарафыннан агымдагы елның апреленнән башлап 6,5% ставкасы белән старт алган, яңа төзелешләр өчен 4 287 ипотека теркәлгән. Шул ук вакытта соңгы өч айда иң зур активлык күзәтелә: июль аенда-958, август аенда – 890, сентябрьдә 907 ипотека теркәлгән. Октябрьнең беренче ике атнасында ук-779! Чагыштыру өчен: май аенда – 300 гә якын, июньдә 450 дән артык ипотека теркәлгән. Соңгы айларда Татарстанда ташламалы ипотекага сорау ике-өч тапкырга арткан.

Татарстанда күчемсез милек базарында, яңа коронавирус инфекциясе таралуга бәйле ситуациягә карамастан, активлык сизелерлек артты. Әйтик, Татарстан Росреестры мәгълүматлары буенча, 2020 елның 9 аенда төбәктә сату-алу килешүләре нигезендә 100 меңгә якын хокук күчеше теркәлгән. Бу узган ел белән чагыштырганда 20% ка күбрәк.

Татарстан Республикасы буенча Роспотребнадзор идарәсенең Чаллы шәһәре, Актаныш, Тукай, Мөслим, Минзәлә районнары территориаль бүлеге кулланучылар хокукларын яклау һәм кеше иминлеге өлкәсендә күзәтчелек буенча Федераль хезмәт тарафыннан 2020 елның 26 октябреннән 9 ноябренә кадәр җиләк-җимеш продукциясенең сыйфаты һәм иминлеге мәсьәләләре һәм яраклылык вакыты буенча «кайнар линия» үткәрелүе турында хәбәр итә. Барлык кызыксындырган сораулар буенча әлеге номерлар буенча шалтыратырга мөмкин 8 800 555 49 43, (88552) 32-06-07, (885552) 3-09-62.

Бүген район башкарма комитетында авыл җирлеге башлыклары белән очрашу оештырылды. Утырышта Башкарма комитет җитәкчесе Илшат Илфат улы Габделхәев, район Советы рәисе урынбасары Рәйхан Флүс кызы Галимҗанова, районның финанс –бюджет палатасы рәисе Кадрия Рәмзи кызы Каюмова, Башкарма комитетының инфраструктур үсеше бүлеге җитәкчесе Фоат Нури улы Фазлыев, ТР Кулланучылар хокукларын яклау һәм кеше иминлеге өлкәсендә күзәтчелек буенча федераль хезмәтнең Чаллы шәһәре идарәсе җитәкчесенең Актаныш районындагы урынбасары Луиза Мәхиян кызы Хафизова, ТР Министрлар Кабинетының Баш ветеринария идарәсе Чаллы шәһәре буенча территориаль бүлегенең ветеринария инспекторы Рәҗәп Хәлил улы Галиев, Актаныш районы ветеринария берләшмәсе җитәкчесе Фиргать Әсхәт улы Абдрахманов катнашты. Һәр авыл башлыгы белән, җирлеккә аерым якын килеп, су чыганакларын лицензияләү, авыл җирлекләрендә үзара салым җыюның үтәлеше, салым җыйнау, торак төзелеше һәм башка  җирлек өчен әһәмиятле мәсьәләләр уртага салып анализланды, утырышта катнашкан җитәкчеләр тарафыннан авылларда булган проблемаларны хәл итү юллары күрсәтелде.

Бүген сәламәт яшәү рәвеше модада. Физкультура һәм спорт белән шөгыльләнү киң колач алды. Чибәр, матур, үз яшенә караганда яшьрәк күренү өчен бүген актанышлылар да кимен куймый. Аеруча хатын-кызларыбыз нык тырыша. Зифа буйлы булу өчен ханымнар иртәнге йокыларын да кызганмый, йөгерергә чыгалар, кичен аэробика белән шөгыльләнергә дә вакыт табалар. Әмма моның белән генә эш бетми әле- сәламәтлекнең бик күп өлеше ничек туклануга турыдан-туры барып тоташа. “ПП”га, ягъни дөрес туклануга күчүчеләр сәламәтлекләрен ныгытып кына калмыйлар, берочтан артык авырлыктан да котылалар. “ПП”ның таләпләре катгый- дөрес туклану белән беррәттән тиешле күләмдә су да эчәргә кирәк. Үз гәүдә авырлыгыңны 0,3 санына тапкырласаң, көнлек су нормасы килә дә чыга. Якынча ул 2 литр чамасы.

2020 елда Татарстан Республикасында Кеше хокуклары буенча вәкаләтле вәкил дәүләт органнары җитәкчеләре белән гражданнарны уртак кабул итү практикасы дәвам итә.

2020 елның 20 октябрендә 14.00 сәгатьтән 16.00 сәгатькә кадәр Татарстан Республикасында Кеше хокуклары буенча вәкаләтле вәкил Аппаратында (Казан шәһәре, Карл Маркс урамы, 61 йорт) Татарстан Республикасында Кеше хокуклары буенча вәкаләтле вәкил һәм Татарстан Республикасы хезмәт, халыкны эш белән тәэмин итү һәм социаль яклау министры гражданнарны кабул итә.

Шулай ук республиканың муниципаль районнарында яшәүчеләрнең үз сорауларын  «Skype» программасы аша турыдан-туры тоташу юлы белән бирү мөмкинлеге булачак.

2020 елның 9-13 ноябрендә "Ритейл атнасы" алтынчы халыкара бизнес-форумы узачак.

«Ритейл атнасы» - ваклап сату өлкәсен үстерүнең төп юнәлешләре формалаша торган төп тармак чарасы, биредә ритейлның заманча һәм цивилизацияле базарын үстерүгә якын килүе билгеләнә, тармак проблемалары күтәрелә.

Алдан фаразлаганча,   дөнья, ил күләмендә пандемиянең яңа дулкыны баш калкыта.  Райондагы хәлнең торышы,  халык иминлеген һәм сәламәтлеген кайгырту буенча Актаныш район башлыгы Энгель Фәттахов бүген чираттан тыш киңәшмә үткәрде. Социаль учреждениеләрдә, сату нокталарында, мәктәп-бакчаларда, оешма-предприятиеләрдә саклык чаралары күрүдә, эшне һәм укытуны  гадәти режимда оештыруда бүген аеруча да уяулык һәм җаваплылык сорала. Узган тәүлектә үзәк хастаханәгә 33 райондашыбыз – ОРВИ, 22 кеше пневмония диагнозы белән мөрәҗәгать иткән. Әлеге хакта район үзәк хастаханәсе баш табибы урынбасары Рөстәм Могътазиров бәян итте.

Хөрмәтле гражданнар!

Татарстан Республикасы Гидрометеорология һәм әйләнә-тирә мохитне күзәтү идарәсе мәгълүматлары буенча метеорологик күренешнең көчәюе турында консультация-кисәтү.

Татарстан Республикасы территориясендә 2020 елның 21 октябрендә көндез урыны белән көчле җил көтелә, көчәйгәндә 15-18 м/с кадәр.

Россия Гадәттән тыш хәлләр министрлыгының Татарстан Республикасы буенча Баш идарәсе халыкка тәкъдим итә:

Җил көчәйгәндә:

1. Биналардан чыгуны чикләргә. Балаларны караучысыз калдырмау мөһим.

2. Әгәр көчле җил сезне урамда очратса, җир асты кичүләрендә яисә биналарның подъездларында яшеренергә киңәш итәбез. Көчле җилдән йортларның стеналары янында качып торырга кирәкми, чөнки түбәдән шиферның һәм башка түбә ябу материалларның төшүе мөмкин. Бу шулай ук җәмәгать транспорты тукталышларына, төзелеп бетмәгән биналарга да кагыла.

3. Урамда реклама щитларыннан, вывескалардан, юл билгеләреннән, электр линияләреннән ераграк торырга кирәк.

4. Зур агачлар янында булырга, шулай ук алар янында автотранспорт куярга ярамый - җил өзгән ботаклар зур куркыныч тудыра.  

5. Көчле җил вакытында электр тапшыру линиясе астында тору һәм өзелгән электр үткәргечләренә якын килү куркыныч.

6. Өске катларның тәрәзәләреннән төшкән ватык пыялалар, шулай ук түбә элементлары куркыныч тудыра. Төзелеп килүче яки ремонтлана торган биналар янында мондый куркыныч арта.

7. Йортларның барлык тәрәзәләрен дә тыгыз итеп ябарга, балконнардан тышка коелырга мөмкин булган предметларны алып куярга кирәк.

8. Торак яки эш урынында тәрәзәләрдән мөмкин кадәр ераграк торырга кирәк

Теләсә нинди бәла булган очракта сез һәрвакыт ашыгыч хезмәтләрне бердәм чакыру номерына – «101,112»мөрәҗәгать итә аласыз. Шалтыратулар тәүлек әйләнәсе һәм шәһәр һәм кәрәзле телефоннардан бушлай кабул ителә.

ТР буенча Россия ГТХМ Баш идарәсенең "ышаныч телефоны" 8 (843) 288-46-96.

Республикадагы матди ярдәм күрсәтү үзәгенең Актаныш районындагы бүлекчәсе Хөкүмәт кануннарына нигезләнеп, ТР Дәүләт һәм муниципаль хезмәтләр порталы аша гаризаларны кулдан гына түгел электрон форматта да кабул итә. Күпбалалы гаиләләр, балалар бакчалары компенсацияләре, 16 яшькәчә балаларга пособиеләр, пенсионерларның юл акчалары, беренче тапкыр инвалидлык алучылар белән беррәттән, беренче балаларга Путин түләүләре, азкеремлелек буенча субсидияләргә дә портал аша гариза бирергә була. Гаризваны юллау өчен ТР Дәүләт һәм муниципаль хезмәтләр порталына шәхси кабинет ачарга кирәк. Шулай ук шәхси кабинетны күпфункцияле үзәктә дә ачарга мөмкин, логин-парольләр гариза язучыга шунда ук бирелә.