ЯҢАЛЫКЛАР

Бүген  - 24 сентябрь көнне «Пирамида» мәдәни-күңел ачу комплексында «ЛУКОЙЛ» ГАҖ социаль һәм мәдәни проектлар конкурсына йомгак ясау тантанасы узды. Гран-прига Минзәлә интернат-мәктәбе «Мәрхәмәт юлыннан» проекты белән лаек булды, «Лада Ларгус» автомобиле белән бүләкләнде.

«РИТЭК» ҖЧҖ («ЛУКОЙЛ» ГАҖнең бүлендек предприятиесе) март аенда Татарстан һәм Самара өлкәсендә «ЛУКОЙЛ» ГАҖ социаль һәм мәдәни проектларының Х конкурсы башлануын игълан иткән иде. Гаризалар 31 июльгә кадәр кабул ителде һәм өч номинация: «Экология», «Рухият һәм мәдәният» һәм «Спорт» буенча каралды.

Быел конкурс комиссиясенә 766 гариза кергән, 153 проект җиңүче дип табылган, гомуми грант суммасы 25 миллион.

«РИТЭК» ҖЧҖ һәм «ЛУКОЙЛ» Хәйрия фонды конкурсында катнашып, Актаныш районыннан Адай мәдәният йортыннан Эльмира Муллаянова "Чиста чишмә", Пучы авылындагы ветераннар һәм инвалидлар йортыннан Роза Мәрданова "Уңайлы камин", Пучы мәктәбеннән Ләйсән Газизова "Шатлык " халык биюе балалар иҗат коллективына ярдәм итү", район сәнгать мәктәбеннән Сәвия Таһирова "Иҗат коллективларына ярдәм итү" проектлары белән җиңү яулады.

Томск шәһәрендә Бөтенроссия татар төбәген өйрәнүчеләр форумы узды. «Татар шәһәр бистәсе: үткәне, бүгенгесе, яңарыш һәм үсеш перспективалары» (Россия Федерациясе шәһәрләрендә татар бистәләрен саклау стратегиясе) темасы буенча оештырылган әлеге чара туган якны өйрәнүчеләрнең эшчәнлеген үстерү, Татар шәһәр бистәсе һәм татар халкы турында тарихи-мәдәни мәгълүматларны тарату, республикабызда, төбәкләрдә тарихи-мәдәни мирас объектларын саклау максатларын үз эченә алды.

Әлеге форумның катнашучысы буларак, миңа Казахстан, Үзбәкстан, Төркия һәм Голландия вәкилләре белән аралашырга, үзара фикер алышырга туры килде. Көн дәвамында эшләгән секцияләр һәм пленар утырыш барышында без татар авыллары тарихын язганда тарихи-мәдәни мирасны җентекләп өйрәнү, саклау, куллану һәм таныту кысаларында, татар халкының милли традицияләрен, рухи мирасын, гореф-гадәтләрен, кәсепләрен һәм мәдәниятен үстерүнең перспектив юнәлешләрен билгеләдек. “Татар шәһәр бистәсе - урбанизация һәм глобализация чорында татар мәдәниятен саклау һәм үстерүнең төп чыганагы” дип исемләнгән секция утырышында “Диңгез, күл, елга бассейннарындагы татар шәһәрләре торак пунктларында балыкчылык һәм корабчылык (Идел-Урал җирлеге мәгълүматлары буенча)” темасы буенча чыгыш ясадым.

2 октябрь көнне  «Россия юристлары ассоциациясе» Гомумроссия иҗтимагый оешмасының Татарстан төбәк бүлеге тарафыннан Өлкәннәр көненә багышланган Бердәм түләүсез юридик ярдәм күрсәтү көне үткәрә.

Чараны республика районнарында һәм шәһәрләрендә 8:00 сәгатьтән 15:30 сәгатькә кадәр (Казан шәһәрендә 9:00 сәгатьтән 16:30 сәгатькә кадәр) тәнәфессез, көндезге ялсыз  консультантларның алмаш составы белән үткәрү планлаштырыла:

- "Бердәм РОССИЯ" партиясе рәисенең региональ иҗтимагый кабул итү бүлмәсендә;

- "Бердәм РОССИЯ" партиясенең район (шәһәр) бүлекләрендәге җәмәгать кабул итү бүлмәләрендә;

- Россия юристлары ассоциясенең Татарстан төбәк бүлекчәсе халыкка түләүсез юридик ярдәм күрсәтү үзәкләрендә.

Актаныш районы, Актаныш авылы, Юбилей урамы, 4 нче йорт адресы буенча түләүсез юридик ярдәм күрсәтүнең бердәм көнендә  кизү тору графигы:

Пенсия фонды белгече Сәетов Алмаз Мирсәлим улы              8: 00-9: 30;

Суд приставы Нурлыев Наил Нургаян улы                                9:30-11:00;

Нотариус Янгирова Ләйсән Сөнәгать кызы                             11:00-12:30;

" ТР БТИ " АҖ Актаныш бүлекчәсе җитәкчесе вазыйфаларын башкаручы

Тимирова Энҗе Хавил кызы                                                      12:30-14: 00;

Адвокат Юсупов Родин Долмаган улы                                     14: 00-15: 30.

Дәүләт Думасы эш бирүчедән хезмәт хакы буенча бурычларны түләттерүнең судтан тыш тәртибен билгеләүче Хезмәт кодексына төзәтмәләрне беренче укылышта кабул итте.

Дәүләт Думасы депутаты, Икътисадый сәясәт, сәнәгать, инновацияле үсеш һәм эшмәкәрлек буенча комитет рәисе урынбасары Әлфия Когогина новеллага комментарий бирде:

"Әлеге закон проекты белән без гражданнарның хезмәт хокукларын намуссыз эш бирүчеләрдән яклыйбыз. Эш бирүчедән хезмәт хакы буенча бурычларны мәҗбүри түләтү мөмкинлеге халыкка тиешле түләүләрне тизрәк алу мөмкинлеге бирәчәк".

23 сентябрь көнне Актаныш район башлыгы Энгель Нәвап улы Фәттахов “Актаныш агрегат заводы” ябык акционерлык җәмгыятенең эшчәнлеге белән танышты. Иң элек, Энгель Нәвап улы завод җитештергән продукция ассортименты-күргәзмәлек белән танышты. Завод   КамАЗ машиналары өчен 20 төрдә детальләр эшли. Ел саен җитештерү күләме арту  биредә хезмәт куючыларның тырышлыгы, яңалыкка омтылып эшләү нәтиҗәсе.

Актаныш агрегат заводы директоры Гадел Хисмәтуллин заводның эшчәнлеге, үсеш темплары, 2019 елдагы перспектив эшчәнлек белән таныштырды, гомуми икътисадый күрсәткечләргә тукталды. Эшчәнлекләренә хисап, анализ ясауны презентация форматында район башлыгына тәкъдим итте.

Заводның баш инженеры Фәрит Вәлиев Энгель Нәвап улын хезмәтне саклау мәсьәләләре, җитештерү планнарын үтәү, җиһазларның торышы, 2019 елдагы эшчәнлек  белән таныштырды. Җитештерүне модернизацияләү һәм оптимальләштерү буенча башкарылган эшләр, экономия ясау  турында да сөйләшү барышында бәян ителде. ISO/TS халыкара сыйфат сертификатлары нигезендә продукциянең сыйфатын күтәрүдә дә максатчан эшли завод.

20 сентябрьдә,  «Сәламәтлек саклау» федераль проектын тормышка ашыру кысаларында,  Яр Чаллы шәһәренең Ашыгыч медицина ярдәме хастаханәсе(БСМП) «Мобиль поликлиника»сы Актаныш районының Пучы авылында халыкны кабул итә, күчмә карау  уздыра башлады.

Тар профильле белгечләр: табиб-кардиологлар, невролог, кан тамырлары хирургы һәм уролог 132 кешегә карау һәм консультация үткәрделәр. 23-24 сентябрьдә мобиль комплекс үз эшен Пучы авылында дәвам итәчәк, якын-тирә авылларда яшәүчеләргә дә, график нигезендә, консультацияләр биреләчәк. 25 сентябрьдән 3 октябрьгә кадәр мобиль комплекс Актанышта үз эшен җәелдерәчәк.

Ветераннарыбызны олуг юбилейлары белән котлау районыбызда матур традициягә әверелде. 23 сентябрь көнне тыл ветераны Батталов Зиннур Баттал улына 90 яшь тулды. Ветеранны әлеге истәлекле көн белән район башкарма комитеты җитәкчесенең социаль мәсьәләләр буенча урынбасары Ләйсән Фоат кызы Нурлыева котлады. Ул аңа РФ Президенты Владимир Путинның котлау телеграммасын һәм Актаныш районы башлыгы Энгель Фәттахов исеменнән истәлекле бүләк тапшырды.

- Сезнең буын үзенчәлекле хезмәт сөючәнлек, эшкә җитди һәм хәтта героик караш белән аерылып тора. Сезгә чын күңелдән нык сәламәтлек, иминлек, якыннарыгызның игътибарын һәм ярдәмен тоеп яшәүне, иртәгәге көнгә ышаныч һәм озын гомер телим! – дигән юлларны Ләйсән Фоат кызы ассызыклап үтте. Юбилярны шулай ук Кәзкәй авыл җирлеге башлыгы Хөрмәев Мәхтүмҗан Мөхәммәтулла улы һәм туганнары котлады. Алар аңа чын күңелдән ныклы сәламәтлек, озын гомер, яхшы кәеф, туганнары һәм якыннарының игътибарын һәм мәхәббәтен теләделәр.

Зиннур Батталов әңгәмә барышында үзенең тормыш юлы һәм хезмәт эшчәнлеге турында сөйләде. Зиннур Баттал улы - Татарстан Республикасының Атказанган авыл хуҗалыгы хезмәткәре, Кәзкәй авылының хөрмәтле аксакалы бүген дә көр күңел белән, дөнья яңалыкларыннан хәбәрдар булып яши. Ихлас теләкләрдән күңеле нечкәреп, үзенә күрсәтелгән хөрмәткә рәхмәт әйтеп озатып калды ул бәйрәм кунакларын.

Алдан хәбәр иткәнебезчә, 16 сентябрьдә "Кадастр эшчәнлеге турында" һәм "Күчемсез милеккә дәүләт теркәве турында"гы законга үзгәрешләр көченә керде.

Алар җир кишәрлекләре хуҗаларына кадастр эшләре барышында исәпкә алынмаган квадрат метрларны законлаштыру мөмкинлеге бирәләр.

Шул ук вакытта Росреестр аңлата: милек хуҗалары комплекслы кадастр эшләре уздырылуын көтмичә дә, шәхси тәртиптә ызанлау уздыра һәм кадастр инженерларына мөрәҗәгать итеп, үз кишәрлекләре чикләрен аныклый алалар.

"Татарстан Республикасы халык сәнгать кәсепләрен  үстерү үзәге" ДБУ Татарстан Республикасы һөнәрчелек палатасы белән берлектә, Татарстан Республикасы Президенты Р.Н.Миңнеханов ярдәме белән, "Татарстан Республикасының Туристлык сувениры-2019" IV ачык конкурс башлану турында игълан итә.

Бу бәйге ел саен үткәрелә һәм күп кенә осталарга, һөнәрчеләргә, сәнгать һәм иҗат коллективларына, берлекләргә, шулай ук балалар оешмаларына үзләрен күрсәтергә мөмкинлек бирә, шулай ук Татарстан Республикасы регионнарының туристик җәлеп итүчәнлеген арттыра.

Конкурс турында нигезләмәне tursuvenir16.ru сайтында табарга була. Бәйге 7 номинациядә уза. Һәр номинациядә җиңүчеләр дипломнар һәм 50 мең сум күләмендә акчалата приз белән бүләкләнә.  Конкурста катнашу өчен 25 октябрьгә кадәр  гаризаны түбәндәге адрес буенча бирергә кирәк: Казан, Мәскәү ур., 55-401, яки электрон почтага җибәрергә: konkurs-suvenirov@yandex.ru  .

Тулырак мәгълүмат  tursuvenir16.ru  сайтында. Белешмәләр өчен телефон: 8 (843) 264-45-12, 236-06-43.

1 октябрь көнне Татарстан Республикасында Бала хокуклары буенча вәкаләтле вәкил Татарстан Республикасы Сәламәтлек саклау министрлыгы белән берлектә сәламәтлек саклау өлкәсендә балаларның хокукларын һәм законлы мәнфәгатьләрен яклау мәсьәләләре буенча гражданнарны кабул итәчәк.

Татарстан Республикасы Сәламәтлек саклау министрлыгыннан гражданнарны кабул итүдә Татарстан Республикасы Сәламәтлек саклау министрының беренче урынбасары Абашев Альмир Рәшит улы һәм Татарстан Республикасы Сәламәтлек саклау министры урынбасары Яркәева Фәридә Фатыйх кызының катнашуы планлаштырыла.

Әлеге чарада катнашырга теләгән гражданнарга (843) 236-61-64 телефоны буенча алдан язылырга кирәк. Кабул итү Татарстан Республикасында Бала хокуклары буенча вәкаләтле вәкил аппаратында (Казан шәһәре, Карл Маркс ур., 61 йорт) узачак.