ЯҢАЛЫКЛАР

“Районыбызның хөрмәтле транспорт хезмәткәрләре, мөхтәрәм ветераннарыбыз!

Сезне автотранспортчылар көне белән ихлас күңелдән тәбрик итәм!

Әлеге бәйрәм техника  белән идарә итүче һәркемгә  кагылса да, асылда аны шофер һөнәренә ия булып, шул юнәлештә төрле тармакларда хезмәт куючыларыбыз  билгеләп үтә.

Районыбыз яшәешендә һәр тармакның эшчәнлеге шоферлар хезмәте белән  бәйле. Безнең җирлектә эшчәнлек  һава транспорты аша башкарылмый, районнан тимер юллар да үтми, шунлыктан, бар йөкләнеш автомобиль юлларында   йөрүчеләрдә.

Районыбызның социаль-икътисадый өлкәсендә шоферларыбыз хезмәте аеруча да әһәмиятле. Алар ярдәме белән басу-кырлырыбызда игеннәр гөрләп үсә, ындыр табаклары ашлык белән тула, аларның тырышлыгы белән үзебездә җитештерелгән продукция шәһәр халкына, хәтта чит өлкәләргә кадәр озатыла. Аларның хезмәте аша авылларыбызның йөзе үзгәрә, киләчәге формалаша - матур-матур йортлар, социаль объектлар төзелә, юллар яхшыра, төзелешләр бара, тормышыбыз, яшәү дәрәҗәбез яхшыра. Әлеге мактаулы һөнәрне хезмәт династиясенә әверелдереп, югары хезмәт үрләренә ирешкән буыннар чылбырының күп булуы да әлеге һөнәрнең дәрәҗәсен арттыра.

Кадерле шоферлар, хезмәт ветераннары! Районыбыз үсешенә лаеклы өлеш кертүегез өчен сезгә ихластан рәхмәтемне җиткерәм. Эшләрегездә һәрчак зур уңышлар, имин юллар, гаилә бәхете, шатлык-куанычлы көннәр,  ныклы сәламәтлек телим.”

“Иң яхшы авыл хуҗалыгы предприятиесе” номинациясендә күчмә кубок белән “Наратлы” хуҗалыгы бүләкләнде. Икенче урында – “Әнәк” агрофирмасы, өченче урында – “Чишмә” агрофирмасы һәм “Чишмә” хуҗалыгы.

“Авыл хуҗалыгы комплексында хезмәт күрсәтүче иң яхшы сәнәгать предприятиесе” номинациясендә Актаныш икмәк кабул итү предприятиесе күчмә кубок белән бүләкләнде. Икенче урында -  Актаныш агрегат заводы, өченче урында - Актаныш икмәк комбинаты.

“Иң яхшы транспорт һәм торак-коммуналь хуҗалыгы предприятиесе” номинациясендә күчмә кубок белән “Теплосервис” җәмгыяте бүләкләнде. Икенче  урында  - Актаныш автотранспорт предприятиесе, өченче  урында  – “Коммунсервис – Актаныш”.

“Иң яхшы капиталь төзелеш предприятиесе” номинациясендә күчмә кубок белән "Газстройсервис" җәмгыяте  бүләкләнде. Икенче урында –“Актаныш юллары”, өченче урында - “Стройком” җәмгыяте.

      Советлар Союзы Герое Хәсән Заман исемендәге Актаныш кадет интернат-мәктәбендә бүген ант кабул итүгә багышланган тантаналы бәйрәм булды. Укучылар Туган илне, Ватанны сакларга әзерләнергә ант иттеләр. 
Мәктәп өчен шулкадәр әһәмиятле һәм мөһим күренештә укучыларның ата-аналары һәм администрация вәкилләре катнашты.
      Бәйрәмдә традиция буенча укучылар тантаналы рәвештә ант текстын укыдылар һәм табельгә үз кулларын куйдылар. Бу көнне  46 укучы ант кабул итте. Шушы көннән башлап, алар кадет исеме алдылар. Аларның йөзләре җитди, төпле. Алар бу көнгә үзләренчә әзерләнделәр: төгәл итеп хәрби команда бирергә, стройда матур итеп йөрергә, ант сүзләрен яттан сөйләргә. Бу кодекс кадет тормышында берничә ел саклана.
      Ант кабул иткәннән соң, балалар килгән кунакларга концерт номерлары, кадет маршы, вальсы, кул сугышы күрсәтте.
     Ант кабул итү сүзләре яңгырап туктаганнан соң, кадетларны мәктәп директоры Илсур Ялалов, район башкарма комитет җитәкченең социаль мәсьәләләр буенча урынбасары Ләйсән Нурлыева, район хәрби комиссариат җитәкчесе Ленар Әхмәтҗанов котлады. Алар укучыларның сәламәт, ныклы характерлы, батыр, үз максатына ирешә алучы, сәләтле яшьләр булуларын теләделәр.
Кадетлар ант кабул итүнең мәгънәсен яхшы аңлыйлар. Бу минутта алар укытучыларның һәм ата-аналарның каршында горур басып торды, тантаналы рәвештә мәктәп байрагын хәрби адымнар белән алып барды.    Кичә балалар гади мәктәп укучылары булсалар, бүген алар - кадет. Ә әниләрнең һәм укытучыларның күзләрендә сөенеч яшьләре иде.

25 октябрь көнне Иске Кормаш – Кыркаентүбә юлы тантаналы ачылды. Республика программасы нигезендә ике ел дәвамында алып барылган төзелеш эшләре тәмамланып, асфальт юл эксплуатациягә тапшырылды. Юлны ачу тантанасы Иске Кормаш мәктәбе янындагы мәйданчыкта үтте.

Чарада район Советы рәисе урынбасары Рәйхан Галимҗанова, район Советы аппараты җитәкчесе Альберт Тимиров, “Татавтодор” җәмгыятенең Минзәлә филиалы директоры Марат Сәмигуллин, юл төзүчеләр, авыл халкы катнашты.  Юл-төзү эшендә нәтиҗәле хезмәт куйган  эшче-хезмәткәрләр район башлыгы Энгель Фәттаховның,  “Татавтодор” җәмгыятенең генераль директоры Айрат Шәймиевнең мактау кәгазьләре  һәм рәхмәт хатлары белән бүләкләнде.

-Кыркаентүбә авылыннан балалар мәктәпкә йөреп укый, Кыркаентүбә авылында сөтчелек фермасы, фермерлар эшли. Юлда һәрвакыт хәрәкәт. Юлның төзелеп бетүен сөенеп көттек. Авыл халкының сорауларын искә алып, юл салуны программага кертергә ярдәм иткән район һәм республика җитәкчеләренә рәхмәт. Кыркаентүбәдән Шәбезбашка кадәр юлны төзекләндерәсе бар. Аны эшләү 2020 ел программасына кертелгән. Халык анысын да зарыгып көтә.  Иске Кормаш авылы урамнары да  начар хәлдә бүгенге көндә, төзекләндерүне сорый. Киләчәктә  авыл юлларын да максатчан юл программаларына кертеп булса, бик әйбәт булыр иде, - дип, авыл халкының сөенече белән уртаклашты авыл башлыгы Илшат Кәшбразыев.

25 октябрьгә һава торышы.

Иске Кормаш – Кыркаентүбә юлы тантаналы ачылды.

Татарстан  Республикасы Авыл хуҗалыгы  һәм азык-төлек  министрлыгы «2017 - 2020 елларга крестьян (фермер) хуҗалыклары  базасында  гаилә терлекчелек  фермаларын  үстерү» программасы  буенча    крестьян (фермер) хуҗалыкларын сайлап  алу  өчен   өстәмә  конкурс  уздыру  турында  игълан итә.

Грантның күләме, КФХның үз акчаларын һәм аның чыгымнар планын  исәпкә  алып,  министрлык  тарафыннан  билгеләнә.    Эре  мөгезле  терлекләр үрчетү өчен  грантның  иң  чик  күләме, өстәлгән бәягә салымны (НДС)  исәпкә  алмыйча,  бер  хуҗалыкка   30 млн сумнан һәм чыгымнарның  60% ыннан артык була  алмый. Башка төр  авыл  хуҗалыгы хайваннарын, кош-кортлар  һәм  балыклар  үрчетү  һәм тоту  өчен  -   20 млн сумнан  күбрәк  була  алмый.

Заявкалар  һәм   документлар   2019 елның  23 октябреннән  21  ноябренә  кадәр Татарстан  Республикасы Авыл хуҗалыгы  һәм азык-төлек  министрлыгы  белгечләре  тарафыннан  түбәндәге  адрес буенча  кабул  ителә:   420014,  Татарстан  Республикасы, Казан шәһәре,    Федосеев ур., 36 йорт, 3 кат, 309 каб. Кабул  итү  эш көннәрендә    9.00 сәгатьтән  16.00 сәгатькә  кадәр башкарыла.

Грантлар бирү  тәртибе  һәм  документлар  формалары  турындагы мәгълүматны     сылтама буенча  кереп  карарга  мөмкин  http://agro.tatarstan.ru/rus/file/pub/pub_2073217.pdf .   

Бүген район башлыгы Энгель Фәттахов Актаныш районы авыл хуҗалыгы һәм азык-төлек идарәсе бүлек җитәкчеләре   белән берлектә хуҗалык җитәкчеләре, белгечләре, авыл җирлеге башлыклары, фермерлар катнашында терлекчелек тармагында агымдагы елның сентябрь ае  эшчәнлегенә йомгак ясадылар.

Киңәшмә көнүзәк сорауларга ачыклык кертү белән башланды. Хуҗалык басуларына, аеруча да кукурузга кабан дуңгызларының керүе, уңышка зыян китерүләре буенча ярдәм сорап хуҗалык җитәкчеләре район авыл хуҗалыгы идарәсенә дә, район башлыгына да мөрәҗәгать иткәннәр иде. Киңәшмәдә Актаныш аучылык җәмгыяте җитәкчесе Ильяс Галләмов булган сорауларга ачыклык кертте.

Җитәкче-белгечләрне, фермерларны кызыксындырган һәм авыл хуҗалыгы җитештерүендә стимул булып торган дәүләт ярдәмнәре һәм субсидияләр бирү тәртипләре, яңалыклар, документларның электрон хәрәкәте белән район авыл хуҗалыгы һәм азык-төлек идарәсенең финанс-икътисад бүлеге җитәкчесе Дилүс Мөхәмәтдинов таныштырды.

Бүген - 24 октябрьдә Татарстан Республикасы буенча Монополиягә каршы федераль хезмәт идарәсенең район территориясенә визиты булды.

Традиция буенча Актаныш муниципаль районы территориясендә район җитәкчелеге белән эшлекле очрашулар, мәктәптә ачык дәрес, гражданнарны кабул итү булды.

Сәфәр кысаларында Андрей Розенталь ММЧ вәкилләренең сорауларына җавап бирде: гражданнарны кабул итүдән соң журналистлар өчен брифинг булды.

Татарстан Республикасы буенча Росреестр идарәсенең рәсми сайтында rosreestr.tatarstan.ru  агымдагы елның 9 ае нәтиҗәләре буенча төзелгән кадастр инженерлары рейтингы «кадастр инженерын сайлап алу» өстәмә битендә урнаштырылды.

Кадастр инженерларын аттестацияләүнең чираттагы квалификация имтиханнары үткәрелде. Мәсәлән, туктатып тору һәм баш тарту проценты 35тән артык булса, кадастр инженеры «кызыл зонага» эләгә. Әгәр туктату һәм баш тарту проценты 35 тән ким,  18 проценттан  артык икән  - «ак зона».  Туктатулар һәм баш тартулар 18 проценттан  ким икән – “яшел зона”.

Хәзерге вакытта, ведомство төзегән рейтинг күрсәткәнчә, кадастр инженерларының күбесе «яшел» (167) һәм «ак» (161) зоналарда эшли, “кызыл зона”да   65 кадастр инженеры исәпләнә.