ЯҢАЛЫКЛАР

Татарстан Республикасында Бала хокуклары буенча вәкаләтле вәкил Г.Л. Удачина, Татарстан Республикасы прокуроры урынбасары О. А. Дәминов, Татарстан Республикасы Мәгариф һәм фән министры урынбасары А. М. Әсәдуллина һәм балигъ булмаганнар эшләре һәм аларның хокукларын яклау буенча республика комиссиясенең җаваплы секретаре И. Х. Гарифуллина 20 сентябрь көнне   Актаныш районына киләчәк.

Бала хокуклары буенча вәкаләтле вәкил Актаныш  районында балаларның хокукларын һәм законлы мәнфәгатьләрен яклау белән бәйле проблемалы мәсьәләләр турында фикер алышачак,  балаларның хокукларын һәм законлы мәнфәгатьләрен яклау мәсьәләләре буенча гражданнарны кабул итәчәк, район территориясендә урнашкан мәгариф, сәламәтлек саклау, социаль яклау системасының балалар учреждениеләрен тикшерәчәк һәм балигъ булмаганнар эшләре һәм аларның хокукларын яклау буенча муниципаль комиссиянең киңәйтелгән утырышын үткәрәчәк.

2 сентябрь көнне Актаныш районы кадет мәктәбендә Белем көненә багышланган тантаналы линейка узды. Мәктәп 146 укучы алдында үз ишекләрен ачты, шуларның 21е бишенче сыйныфка керде.

Тигез сафларда кадетлар байрак йөртүче төркемне каршы алды.

Кадетлар һәм бәйрәм кунаклары алдында котлау сүзләре белән Татарстан Республикасы Хәрби комиссариатының Актаныш районы буенча җитәкчесе Ленар Әхмәтҗанов, Актаныш кадет интернат-мәктәбе директоры Илсур Ялалов, 5 нче сыйныф укучыларының ата-аналары чыгыш ясадылар.

Кайчандыр техникум яңа уку елын 200гә якын студент белән генә башласа, быел инде  ул биредә белем алырга теләүчеләрнең артуы белән дә лаеклы горурлана ала. Яңа уку елын ресурс үзәк 341 студент  белән башлап җибәрде – 2 сентябрь көнне техникумда 2019-2020 уку елына  рәсми старт бирелеп, төркем студентларын  беренче кыңгырау чыңы укуга дәште.

Бәйрәм тантанасында катнашкан район башлыгы Энгель Нәвап улы  беренче курска килгән студентларга техникумның районда тоткан дәрәҗәле урынын азсызыклап, биредә  уку-укыту системасының елдан-ел камилләшә баруын билгеләп үтте. Шулай да район башлыгы киләсе елларда студентлар санын тагын да арттыруны бурыч итеп куйды.

- Техникум  500 - 550 балага  белем бирергә, авыл хуҗалыгы өлкәсендә сынатмый торган, ышанычлы  кадрлар әзерләргә тиеш, - дип искәртте ул.

Моның өчен, билгеле, белем бирү сыйфатын тагын да яхшырту, белгечлекләр санын арттыру, кыска вакытлы курслар оештыру мөһим шартлар булып тора.

Техникум директоры Илшат Габделхәев та студентларны яңа уку елы белән тәбрик итте.

Җитәкче   югары уку йортлары, “КамАЗ” җәмгыяте, район хуҗалыклары белән ике арада булдырылган хезмәттәшлекләрнең мөһим адым булуын билгеләп үтте.  Техникумны тәмамлаган 8  студентның Казан дәүләт аграр университетында белем алуларын дәвам итүләре дә игътибарга лаек яңалык иде. Гомумән, Илшат Илфат улы Актаныш технология техникумында белем алуның бик күп уңай якларын санады. Аларның берсе: 3-4 ел уку дәвамында берничә төрле һөнәр үзләштерү. Өстәвенә, техникум хәзер WorldSkills стандартлары буенча укыта, ягъни студентлар  заман белән бер адымда атлый дигән сүз бу.

Актаныш технология техникумының яңа уку елына педагогик кадрлары да шактый зур үзгәрешләр кичергән. Студентларга, аларның әти-әниләренә яңа педагогик состав белән танышу мөмкинлеге бәйрәм линейкасында ук тудырылды.

Быел техникумда уку-укыту буенча директор урынбасары вазыйфаларын Юлия Илькаева башкарачак, директорның  методик һәм кадрлар белән эшчәнлек буенча урынбасары итеп Роза Имамова билгеләнгән. Илһам Шакировка - укыту-практик эшчәнлек, Зөлфия Хафизовага  тәрбия эшләре буенча директор урынбасары вазыйфалары йөкләтелгән. Быелдан студентларны химия һәм биология серләренә Айдар Низамов төшендерсә, ОБЖ фәнен шулай ук яңа педагог – Суфиян Илькаев укытачак.

Актаныш технологик техникумында Белем бәйрәме - фоторепортаж.

Хөрмәтле райондашлар! Сезне «Путешествие к истокам – 2019» X республика конкурсында катнашырга чакырабыз.

 Конкурсның максаты - яшьләрне Татарстан Республикасының туристлык үзәкләрен үстерүгә һәм алга таба мавыктыргыч инновацион туристик проектларны тормышка ашыруга җәлеп итү, туган якның туристлык ресурслары, аның мәдәни һәм экологик һәйкәлләре турында яшьләрнең хәбәрдарлыгын арттыру аша патриотизм хисе тәрбияләү.

Конкурста Татарстан Республикасы югары, урта махсус уку йортлары студентлары, гомуми белем бирү мәктәпләре укучылары, эшләүче яшьләр, шулай ук Татарстан Республикасы территориясендә урнашкан яшьләр иҗтимагый оешмалары вәкилләре катнаша ала.

2018 елда конкурска Татарстан Республикасының 27 районыннан 135 гариза керде, Казан һәм республиканың 150дән артык уку йорты катнашты.

        Бүләкләү тантанасы 280 нән артык катнашучыны, мәктәп укучыларын һәм Татарстан Республикасының туризм өлкәсендәге уку йортлары студентларын җыйды.                        Иң яхшы 30 катнашучы дипломнар һәм истәлекле призлар белән бүләкләнде. 

        Конкурс турында Нигезләмә Дәүләт комитетының рәсми сайтында урнаштырылган http://tourism.tatarstan.ru/rus/konkurs-puteshestvuy-k-istokam.htm . Материалларны конкурс комиссиясенә 2019 елның 1 ноябреннән дә соңга калмый тапшырырга кирәк.

        Конкурста җиңүчеләрне һәм дипломантларны рәсми бүләкләү тантанасы 2019 елның 29 ноябрендә булачак.

Яңа уку елын укалап чигелгән милли киемнәрдән, читекләрдән татарча биеп каршы алган гимназия укучылары, бәйрәмгә килгән ата-аналар бүген – 1 сентябрь көнне уку елы дәвамында ниләр белән шөгыльләнәчәкләрен тәгаен белеп, фикерләрен туплап кайтып киттеләр. Ел дәвамында эзләнергә, үз өстендә эшләргә,  ярдәмчел, дус булырга кирәклегенә төшенеп үсүче укучыларга гимназия быел тагын да югарырак максатлар куйды һәм моңа ирешүдә ата-ананың да гимназия белән һәрвакыт элемтәдә булуы сорала. Белем бирүдә һәр этапта, укуда, өстәмә шөгыльдә, үз-үзеңне тотуда, олимпиадада, проектларда катнашуда рейтингта аерым баллар билгеләнгән. Чиректә чыккан һәр билгегә аерым балл, “өчле” икән – балл кими. Республика олимпиадасында җиңсәң – 70, Россия олимпиадасында җиңсәң – 1000 балл. Рейтингта җиңүче 30 укучы (ике тапкырга артык!) быелгы уку елында да чит илгә барачак. Рейтингта балл җыю  быел катлауландырылган, тәртип бозасың, өй эшен эшләмисең икән – һәр очрак өчен 10 балл кими. Быел гимназия белем бирү белән бер югарылыкта тәрбиялелек мәсьәләсен дә күтәрә – юнәлешле программа булдырыла.

-Гимназия укучыларыбызны сагынып көтеп алды. Узган җәй вакыйгаларга аеруча  бай булды. Беренчесе аның – дәүләт имтиханнарын уңышлы тапшыру. Унберенчене сыйныфны тәмамлаучы 22 укучының һәр кайсы дәүләт имтиханнарын 80 нән югары баллга эшләде. Бер укучыбыз өч фәннән дә  90 нан югары балл җыйды, ике укучы  - ике, биш укучы бер фәннән шулай ук 90 нан югары балл җыйды. Бүген һәркайсы Мәскәү, Казан, Ижау, Чаллы шәһәрләрендә югары уку йортларында укуларын дәвам итә. Икенчесе – җәйге “Бүләк” ял һәм сәламәтләндерү лагерендә инглиз телен камилләштерү һәм олмпиадаларга әзерләнү. Өченчесе - рейтингта җиңүче укучыларның район башлыгы Энгель Нәвап улы ярдәме белән  Чехиядә  ике атна дәвамында инглиз теле мәктәбендә белем алулары. Файдалы экскурсияләрдә Европа буенча   экскурсияләрдә дә булдылар укучылар, - дип, гимназия директоры Рузилә Гарипова Белем бәйрәме белән котлап, укучылар ирешкән уңышларга тукталды, укытучыларга, ата-аналарга да рәхмәтен белдерде.

-Кадерле укучылар, хөрмәтле укытучылар, ата-аналар, быел сезнең алда тагын да зуррак максатлар куябыз. Гимназиядә укучы бала белеме белән дә, тәрбиялелеге белән дә аерылып торырга тиеш. Без моңа бала-ата-ана-укытучы бергәлеге белән генә ирешә алабыз, - дип, Актаныш район башлыгы Энгель Фәттахов та бәйрәм котлавында Россиядә һәм Татарстанда мәгариф өлкәсендә барган үзгәрешләргә тукталды. Бәйрәмнең мәртәбәле кунагы Татарстан Республикасы Министрлар Кабинетының Баш ветеринария идарәсе башлыгы урынбасары Айрат Гәрәев Татарстан Президенты Рөстәм Миңнехановның бәйрәм тәбрикләвен ирештерде.

Хуш исле чәчкәләр бәйләме, ак бантлар арасында балачак иленең шаян дус егет-кызларын танып та булмады бүген мәктәпләрдә узган Белем бәйрәмендә! Энәдән генә төшкән костюм-чалбарларын, күлмәк-жилетларын хәсиятләп киеп, кулларына чәчкә бәйләмнәрен тотып, зур өметләр, якты  хыяллар белән мәктәп бусагасын атлап керде алар. Йөзләрендә җитдилек тә, дулкынлану да бар. Өр-яңа, апа-абыйлардан гына ишетеп белгән Белем илендә Беренче укытучы каршы алды аларны. Беренче укытучы, тәүге дәрес. Районыбызның беренче сыйныфка баручы 376 укучысы бәйрәм тантанасында ук инде үз осталыкларын җыр-бию, нәфис сүз аша күрсәттеләр. Югары сыйныфларда укучылардан хәер-фатиха алып, тәүге кыңгырау чыңы астында сыйныф бүлмәләренә юл алдылар алар.

Ел саен күңелдәге матур-моңсу хатирәләрне яңартучы Белем бәйрәмендә мәктәпләребездә мәгариф ветераннары да хөрмәтле кунак буларак катнаша. Укытучы остазлары белән матур элемтәдә эшләүче Актанышның 2 нче мәктәбе районда укучы балаларның да, беренче сыйныфка керүчеләрнең дә күплеге белән аерылып тора.  Быел да 760 баланы укырга кабул итте мәктәп, шуның 104 е – беренчеләр. Бәйрәм тантанасында катнашучы Актаныш  район башлыгы Энгель Нәвап улы Фәттахов та укучыларның чыгышларын мәгариф ветераннары белән бергә тамаша кылды, аларның хәл-әхвәлләрен белде, бәйрәм белән котлады.

Мәктәп ел да укучыларның вальсы, театральләшкән  миниатюралар, заманча флешмоблар белән уку елын ача. Быелгы бәйрәм тантанасында да югары сыйныф укучылары да, беренчеләр дә актив булды. Бәйрәм мизгелләрен Лиана Латыповага ГТО нормаларын үтәгән өчен махсус билге тапшыру да күркәмләндерде. Мәктәп директоры Илшат Вахитов мәктәпкә ярдәмләшеп яшәүче гаиләләргә, ата-аналарга рәхмәтен белдерде, узган ел ирешкән уңышларның быел да дәвамлы булуын теләп, мәктәп данын Бөтенрәсәй югарылыгында яклауны максат итеп куйды.

Хөрмәтле укучылар,  укытучылар, мәгариф ветераннары,  ата-аналар!

Сезне район Советы, район башкарма комитеты һәм шәхсән үз исемемнән 1 сентябрь – Белем бәйрәме белән ихластан котлыйм, исәнлек, саулык,  иминлек телим.

 Бүген районыбызның һәр белем бирү йортында Белем бәйрәме узды, 376 бала тәүге тапкыр мәктәп бусагасын атлап керде. Шуның 104 е – Актанышның 2 нче, 54 е  - Актанышның 1 нче, 20 се – Актанышның “Тылсым” башлангыч мәктәп-бакчасында, 198 е -  авыл мәктәпләрендә.

Илебез, республика җитәкчелеге, Татарстан Президенты Рөстәм Нургали улы Миңнеханов, Татарстанның беренче Президенты Минтимер Шәрип улы Шәймиев белем һәм тәрбия бирү системасының бүген заман югарылыгында яңартылуына, матди-техник базаның камилләшүенә, белем һәм тәрбия бирү сыйфатының XXI гасыр таләпләренә җавап бирерлек булуына максат куеп, өстенлекле проектларны тормышка ашыра. Без дә районда  мәгариф системасының сыйфатлы эшчәнлеге өчен максатчан программалар булдырып эшлибез.  Мәктәпләрнең яңа уку елына әзерлеген кабул иткәндә дә белем һәм тәрбия сыйфатын тәэмин итәрлек шартларны карадык, иминлек, куркынычсызлык, туклану мәсьәләләренә дә төп игътибарны бирдек.

Һәр яңа уку елы ул -   җитди итеп уку, кирәкле белем һәм күнекмәләр алу, талант һәм сәләтләрне үстерү юлында яңадан-яңа урләр куеп эшләү елы.  Быел да  уку алдынгыларының, төрле олимпиада һәм конкурслар җиңүчеләрнең сафлары артуын көтәбез, бердәм дәүләт имтиханнарын 100 баллга бирүчеләр дә район мәгариф системасында үз эзен калдырыр дип ышанабыз. Бала- укытучы- ата-ананың бердәм эшчәнлеге белем бирүдә генә түгел, тәрбия бирүдә дә үз  нәтиҗәсен бирер.

Укучыларыбызга зур өметләр баглыйбыз. Нәкъ менә алар  - районыбызның, республикабызның киләчәген, икътисадын, яңа казанышларын, тарихын һәм мәдәни мирасын формалаштырачак яңача уйлаучы, яңача фикерләүче буын. Без сезгә терәк тә, таяныч та һәм янәшә баручы остаз да булырбыз! Яңа уку елы, яңа эзләнүләр, яңа биеклекләр, яңа иҗади казанышлар белән! Белем бәйрәме белән!

24 август көнне  Татарстан Президенты Рөстәм Миңнеханов хәләл җефете Гөлсинә ханым белән Казан Кремлендә республиканың хөрмәтле, үрнәк гаиләләрен кабул итте. Тантаналы чарага 51 гаилә чакырулы иде.

Актаныш районыннан тантаналы чарада Гимаевлар гаиләсе катнашты. Фәнис абый да, Дания апа да - авылда үз бәхетен тапкан хөрмәтлеләр. Әлеге үрнәк гаилә сентябрь аенда алтын туйларын да билгеләп үтәчәк.

Хөрмәтле Энгель Нәвапович!

Сезне һәм барлык актанышлыларны Татарстан Республикасы көне белән чын күңелдән котлыйм.

Безнең яраткан республикабыз-  күп милләтле, күп динле,  гореф – гадәтләргә бай   хезмәтчәннәр, профессионаллар төбәге. Киләчәктә дә үссен һәм чәчәк атсын.

Һәр гаиләгә бәхет һәм иминлек, аяз күк йөзе, шатлык, игелекле башлангычларыгызда уңышлар телим.

Тирән ихтирам белән, сезнең Дәүләт Думасы депутаты А.Г. Когогина.