ЯҢАЛЫКЛАР

Казанда – аязучан болытлы һава, бераз кар яву көтелә, Төнлә һәм иртән урыны белән томан. Җил көнъяк-көнчыгыштан секундына 4-9 метр тизлектә.

Төнлә һава температурасы -5..-7º, -11º; көндез -3..-5º.

Юлларда  бозлавык.

Актанышта – аязучан болытлы һава, бераз  кар яву көтелә,  урыны белән томан. Җил көнъяк-көнчыгыштан секундына 4-9 метр тизлектә.

Төнлә һава температурасы -7..-10º, -11º; көндез -3..-5º.

Юлларда  бозлавык.

7 декабрь көнне район социаль яклау бүлеге хезмәткәрләре “Ныклы гаилә”  проектын тормышка ашырып, “Без бергә!” балачак бәйрәме оештырдылар.  Иртән балаларны каршы алып, аларны волонтерлар ярдәме белән экскурсияләргә йөрттеләр. Туган як музеенда һәм “Кайнар икмәк” икмәк пешерү комбинатында балаларга аеруча ошады. Хис-тәэсирләрен Балалар иҗат үзәгендә фуршет вакытында да уртаклашты алар.

“Бергәләп атлавы күңелле” дигән бәйрәм тамашасы җыр-бию, уеннар белән үрелеп барды. Балалар район башлыгы Энгель Нәвап улы Фәттахов белән дә очрашты. Балаларга да,  әти-әниләренә дә район тормышында актив булып, аралашып яшәргә, балаларга уңайлы мөмкинлекләр тудыру өчен бергәләп эшләргә, элемтәдә торырга дигән фикерен белдерде Энгель Нәвап улы.

Район башкарма комитеты җитәкчесенең  социаль мәсьәләләр буенча урынбасары Ләйсән Нурлыева үзенчәлекле балалар белән эшләүдә, аларның сәләтләрен үстерүдә киләчәктә дә яңадан-яңа проектлар эшләп, балаларның үз яшьтәшләре арасында шәхес буларак үзләрен табу максаты куелуын белдерде.

Бәйрәмнең балаларны җәлеп иткән мастер-класс өлешендә социаль яклау бүлеге хезмәткәрләре, Балалар иҗат үзәге педагоглары бергәләп эшләде. Балаларның кызыксынуларын күреп, әти-әниләр дә ихлас сөенде. Бик теләп шөгыльләрне өй шартларында куллану тәртибен үзләштерделәр алар.

Балачак бәйрәменә килүче 42 балага да бәйрәмнең тәмле бүләге – кучтәнәч пакетлары тапшырылды.

Инвалидлар декадасы кысаларында "Ихлас" педагогик - психологик үзәк "Үзенчәлекле бала" проектын башлап жибәрде.

Җиңүчеләрне  Актаныш муниципаль район башлыгының коррупциягә каршы көрәш мәсьәләләре буенча ярдәмчесе Айрат Кәрамов,  Актаныш районы башкарма комитетының социаль мәсьәләләр буенча урынбасары Ләйсән Нурлыева,   район мәгариф идарәсе башлыгы урынбасары Айнур Гыймадиев, мәгариф идарәсенең баш белгече Камил Әмиров тәбрик итеп, аларга дипломнар һәм кыйммәтле бүләкләр тапшырдылар.

- Конкурска җибәрелгән иҗади эшләр укучыларның урлауга, ришвәт алуга карашын, мөнәсәбен ачык чагылдыра. Мондый чараларда катнашу аларның җәмгыятьтә актив позициядә торуын билгели, -диде үз чыгышында Ләйсән Фоат кызы.

Актаныш районында коррупциягә каршы көрәш комиссиясе булдырылган һәм ул нәтиҗәле эшчәнлек алып бара. Бүгенге чара кысаларында,  нәтиҗәле хезмәте өчен  күп еллар дәвамында Актаныш муниципаль район башлыгының коррупциягә каршы көрәш мәсьәләләре буенча ярдәмчесе булып хезмәт куйган Илгиз Әмировка, мәгариф идарәсенең баш белгече Камил Әмировка, “Актаныш-информ” ММҮ хезмәткәре Лилия Бәхтиевага, ришвәтчелеккә каршы хезмәтләре өчен, район башлыгы Э.Н. Фәттаховның Рәхмәт хаты тапшырылды. 

Инвалидлар ункөнлеге кысаларында бүген, 7 декабрь көнне, “Актаныш” спорткомплексында мөмкинлекләре чикләнгән райондашларыбыз катнашында Спартакиада оештырылды.

Катнашучылар парадын район башкарма комитеты җитәкчесенең социаль мәсьәләләр буенча урынбасары Ләйсән Нурлыева  сәламләде.

Әлеге чарада барысы 100дән артык мөмкинлекләре чикле райондашыбыз үзенең көчен, елгырлыгын, осталык - үткенлеген күрсәтте.

Спартакиадага төшкән бик күпләр өчен бүген иң мөһиме җиңү түгел, ә катнашу булса да, ярышлар урынсыз, җиңүсез булмый, әлбәттә.

I урынга  Татар Суыксуы авыл җирлеге командасы лаек булды.

II урында  Актаныш авыл җирлеге командасы.

III урынны Актанышбаш авыл җирлеге команадасы  яулады.

Шәхси һәм команда беренчелегенә оештырылган ярышларда җиңү яулаучы райондашларыбызга грамоталар һәм акчалата премияләр тапшырылды.

Инвалидлар ункөнлеге кысаларында участок терапевтлары, гомумгамәли табиблар җирлекләрдә авыруларның хәлен белде. Сәламәтлек мөмкинлеге чикләнгәннәрнең өйләрендә булып, аларның хәлен белгәндә авыруның ни дәрәҗәдә мөстәкыйль тормышка яраклашуына, көндәлек ихтыяҗларына, борчыган авыруының җитдилегенә төп игътибар бирелде.

5 декабрь көнне Түке, Зөбәер авылларында район үзәк хастаханәсе баш табибы Айдар Хәев, клиник-эксперт комиссиясе буенча баш табиб урынбасары Светлана Корбанова, халыкка медицина хезмәте күрсәтү буенча баш табиб урынбасары Рөстәм Могътазиров, гомумгамәли табибә Ләйлә Могътазирова катнашында медицина караулары узды.

Фельдшер-акушерлык пунктларында һәм авыруларның шәхси  йортларда 42 кеше каралды, шуның 18 е үз өендә. Инвалидлык алу ихтыяҗы булган авыруларга консультация бирелде, тикшерү планы билгеләнде.

Казанда – аязучан болытлы һава, көндез кар,юеш кар, урыны белән бозлавык. Җил көнъяк-көнчыгыштан секундына 4-9 метр тизлектә.

Төнлә һава температурасы -7..-9º, -11º; көндез -4..-6º.

Юлларда  бозлавык.

Актанышта – аязучан болытлы һава, көндез кар, юеш кар, урыны белән бозлаык. Җил көнъяк-көнчыгыштан секундына 4-9 метр тизлектә.

Төнлә һава температурасы -8..-11º, -16º; көндез -4..-8º.

Юлларда  бозлавык.

5 декабрь көнне Мәдәният паркында “Хәрәкәт-ул яшәү” дип аталган “Скандинавия йөреше” технологиясе буенча шөгыльләнүче граҗданнар һәм инвалидлар белән чара уздырылды. Чараны халыкка социаль хезмәт күрсәтү үзәге белгечләре күңелле уеннар һәм викторина белән аралаштырып үткәрделәр. Саф һавада пенсионерлар һәм инвалидлар кышкы матур, сихри табигатькә сокланып хозурландылар, файдасын бер-берсенә сөйләп,  вакытны файдалы һәм күңелле итеп уздыру чарасы икәнен һәм көннән-көн кызыксынучылар артуын белдерделәр.

Сәламәтлек - иң зур байлык. Ә бу байлыкка ия булыр өчен күп әйбер кирәкми, бары тик скандинав таягы һәм иренмәскә генә кирәк. Барыбыз да сау-сәламәт булыйк!

6 декабрьдә Россия Пенсия фондының Татарстан бүлекчәсе Инвалидлар ункөнлеге кысаларында инвалидларны пенсия белән тәэмин итү мәсьәләләре буенча бушлай кайнар линия ача.

Бу көнне Пенсия фонды бүлеге белгечләре 10-16 сәгатьләрдә 8-800-100-26-27 телефоны буенча гражданнарга айлык акчалата түләү, инвалидлык буенча пенсия рәсмиләштерү, хезмәткә сәләтле булмаганнарны тәрбияләү, инвалид-балалар һәм балачактан беренче группа инвалидларны карау буенча түләүләр мәсьәләләре буенча консультация бирәләр.

Татарстан  Республикасы Авыл хуҗалыгы  һәм азык-төлек  министрлыгы яңа  эшли  башлаган  авыл  хуҗалыгы  кулланучылар  кооперативларының  матди-техник  базасын  үстерүгә  грантлар  бирү     буенча   конкурс игълан итә. 

Гаризалар  һәм документлар  2018  елның 15 ноябреннән    14 декабренә  кадәр  Татарстан  Республикасы Авыл хуҗалыгы  һәм азык-төлек  министрлыгы белгечләре  тарафыннан  түбәндәге  адрес  буенча  кабул  ителә:    Татарстан  Республикасы,  Казан шәһәре,   Федосеев ур.,  36 йорт, 3 нче  кат, 309 каб.  Кабул  итү  эш көннәрендә  9.00 сәгатьтән  16.00 сәгатькә кадәр  башкарыла. 

Грантлар  бирү  тәртибе  турындагы  мәгълүмат  һәм  документлар  формалары  биредә  урнаштырылган:  http://agro.tatarstan.ru/,  бүлек – «Фермерларга,  авыл  хуҗалыгы  кооперативларына  грантлар һәм шәхси  ярдәмче хуҗалыкларга   субсидияләр»  бүлеге,  бүлекчә – «Авыл  хуҗалыгы  кулланучылар  кооперативларының  матди-техник  базасын  үстерү».