ЯҢАЛЫКЛАР

ТР Авыл хуҗалыгы һәм азык-төлек министрлыгы «Татарстан Республикасы агросәнәгать комплексының иң яхшы хезмәткәре» республика бәйгесенә гаризалар кабул итә башлады.

Бәйгедә һөнәри белеме һәм үз һөнәре буенча кимендә өч еллык эш стажы булган авыл хуҗалыгы тармагы хезмәткәрләре катнаша ала.

Конкурсның төп максаты - Татарстан Республикасы агросәнәгать комплексы белгечләренең эш нәтиҗәлелеген арттыру, агросәнәгать комплексы хезмәткәрләрен үстерү һәм стимуллаштыру, шулай ук агросәнәгать комплексының иң яхшы хезмәткәрләрен ачыклау.

Бәйге «Иң яхшы икътисадчы», «Иң яхшы хисапчы», «Иң яхшы инженер», «Иң яхшы зоотехник», «Татарстан Республикасы Авыл хуҗалыгы һәм азык-төлек министрлыгының Татарстан Республикасы муниципаль районындагы авыл хуҗалыгы һәм азык-төлек идарәсенең иң яхшы зоотехнигы», «Татарстан Республикасы муниципаль районында иң яхшы селекция - нәсел хезмәте җитәкчесе», «Иң яхшы ветеринария табибы», «Иң яхшы агроном», «Иң яхшы кадрлар хезмәткәре» һәм «Агросәнәгать комплексында хезмәтне саклау буенча иң яхшы белгеч» номинацияләре буенча үткәрелә.

Конкурста катнашырга теләүчеләр түбәндәге документлар (гариза, катнашучы анкетасы, урта яки югары белем турындагы документның күчермәсе, хезмәт кенәгәсенең күчермәсе, салымнар буенча бурычларның булмавы турында белешмә һәм бәяләү критерийлары) тәкъдим итәргә тиеш.

Бәйгедә катнашу өчен гариза һәм тиешле документларны быелның 20 ноябренә кадәр ТР Авыл хуҗалыгы һәм азык-төлек министрлыгына тапшырырга кирәк. Өстәмә мәгълүматны 8 (843) 221-76-69 телефоны буенча алырга мөмкин.

20 октябрь көнне  Актанышның 2 нче  мәктәбе волонтерлары Бөгелмә районында узган "БлагоДарение" социаль инициативаларга һәм яшь буынга ярдәм хәйрия фонды волонтерларының IV слетында катнаштылар. "Киләчәккә кара" дигән  проектларын яклап, алар проектны тормышка ашыру өчен 10000 сум күләмендә грант оттылар. 
Слетта волонтерлар үзләренең социаль проектларын якладылар, башка районнардан килгән фикердәшләре белән таныштылар, мастер-классларда катнаштылар.

Актаныш авылының “Умырзая” балалар бакчасы хезмәткәрләре  Яр Чаллы шәһәрендә узган  республикакүләм "Наше время-Безнең заман" эшче-яшьләр иҗат фестиваленең гала-концертында чыгыш ясадылар. "Хореография" номинациясендә - III, "Вокаль ансамбль" номинациясендә II урын яулап, Казанда узачак супер-финалга чакыру алдылар.

21 октябрьгә һава торышы.

20 октябрь көнне Менделеевск шәһәрендә "Татарстан - яңа гасыр" республика иҗтимагый хәрәкәте призына узган турнирда Актаныш волейбол командасы беренче урын яулады. Тренерлары – Ленар Ибнеев. Котлыйбыз, егетләр! Волейболчыларны, тренерларны чираттагы җиңүләре белән Актаныш район башлыгы Энгель Фәттахов котлап, алдагы ярышларда да уңышлы чыгыш ясауларына ышаныч белдерде.

18-20 октябрь көннәрендә Минзәләдә өстәл теннисы буенча Татарстан беренчелеге узды, Актаныш командасы дүртенче урын яулады. Шәхси беренчелектә Ләйсән Лотфуллина икенче урын яулады. Тренерлары – Булат Солтанов.

Кискен көрәштә Саба районы командасы беренче урын алды. Мамадыш районы икенче урында, өченче урында - Кукмара районы, дүртенчедә – Актаныш.

Татарстан Республикасы җирле үзидарә органнары эшчәнлегенең нәтиҗәлелеген күтәрүдәге, җирле әһәмияттәге мәсьәләләрне хәл итүдәге казанышлары, күпьеллык намуслы хезмәте һәм 55 яшьлек юбилее уңаеннан, Мобилизация эшләре буенча Актаныш районы башкарма комитет җитәкчесе ярдәмчесе Нәсим Әзһәм улы Заһертдинов Татарстан Республикасы муниципаль берәмлекләре Советы Ассоциациясе рәисенең Мактау кәгазе белән бүләкләнде.

19 октябрь көнне  Актанышта көзге чистарту өмәсе узды. Район оешма-предприятиеләре, эшмәкәрләр, шәхси хуҗалыклар, яфраклар коела башлау белән, үз территорияләрендә җыештыру, коелган яфракларны җыю эшләрен башлаганнар иде. Чәчкәлекләрне чистарту, язга түтәлләрне  әзерләп кую да башкарылды.  Агач утырту өмәләре барды. 19 октябрь – районкүләм өмәдә дә һәркем актив катнашты, берәү дә читтә калмады. Җирлектәге һәр оешма-предприятие, һәр хуҗалык актив булды.

Районыбызда яшәүче мөселман кардәшләребез дә “Татарча диктант” акциясенә бик теләп кушылды.

Бу көнне Җәмигъ мәчетенең ишекләре һәркем өчен ачык иде.

Билгеләнгән сәгатькә мәчеткә иллегә якын мөслимә җыелды. Алада нәни кыз балаларның булуы да сөендерде.

Иман йортында татарча диктант текстын мөслимә Рулия ханым Шәрәфетдинова укыды.

19 октябрь көнне бөтен дөнья буйлап “Татарча диктант”дип исемләнгән белем бирү акциясе узды. Дүртенче ел оештырылып килүче әлеге әһәмиятле чарага актанышлылар да кушылды.

Район буенча барлыгы 31 мәйданчыкта теләгән һәркем ирекле рәвештә һәм бушлай татар телен ни дәрәҗәдә белүен тикшереп карый алды.  Акциянең максаты – татар телендә хатасыз язарга өйрәнү, татар әдәби телен кулланучыларның даирәсен арттыру, орфографик һәм грамматик хаталарны тикшерү.  Ләкин аның иң мөһим миссиясе – татарлыкны саклап калу.

Бу фикерне Актаныш районында да еш ишетергә туры килде. Чарада катнашучы һәркем акциядә катнашып, татар телен, милли гореф-гадәтләребезне саклап калуга үз өлешен кертте.