Грипп ялгызы гына йөрми

Иң яхшысы – вакытында ясатылган вакцина, дип саный бел­гечләр. Бу хакта Роспотребнад­зорның Татарстандагы идарәсе башлыгы Марина Патяшина да кисәтә. Әмма бу мәсьәләгә һәркем игътибар бирә дип тә әйтеп булмый. Мәсәлән, вакцина ясатучылар балалар бакчасына йөрүчеләр арасында – 31, мәктәп укучыларында 47 процент. Медицина хезмәткәрләренең – 88, мә­гариф өлкәсендә эшләүчеләр­нең – 48, 60 яшьтән өлкәннәрнең – 37, студент­ларның исә 25 проценты вакцина ясаткан. Кайбе­рәүләр алдагы елда вакцина ясаткач катырак да авыруын әйтә, әмма табиблар башка фикердә. “Гриппка каршы ясатылган вакциналар соңгы 5 елда бернинди дә өз­легүләр китереп чыгармады. Ки­ресенчә, сезон дәвамында авыруларны булдырмый калды”, – ди Патяшина.

2014-2015 еллардагы эпидемия чорында гриппның ике А һәм бер В төркеме теркәлгән. Бүген вирусларның кискен тирән сулыш юллары вируслы инфекциясе китереп чыгара торган 200 төре билгеле. Гомумән, Татарстанда гриппка каршы 1 миллион 8 мең 235 кеше вакцина ясаткан. “Узган кышта республика халкы­ның 4,5 проценты чирләгән. Әгәр дә эпидемия турында сүз барса, халыкның 10-20 проценты авырырга тиеш. Узган сезонда да бездә авыру күрсәткече артмады”, – ди белгечләр.

Ә ул арада республикада мәк­тәпләр карантинга ябыла башлаган. Казан, Әлмәт, Минзәләдә кайбер уку йортлары вакытлыча эшчәнлеген туктатты. Казанда бер үк вакытта 13 мәктәпнең 22 сыйныфында укулар алып барылмый. Балаларның 25 проценты 7-10 көн авырый икән, мәктәпләр ябылып тора. Бу беренче чиратта инфекцияне таратмас өчен эш­ләнелә. Чөнки гадәттә салкын тиеп авырып китүчеләр арасында күпчелекне балалар тәшкил итә. Һәм алар чирне олыларга да йоктыра. Статистика мәгълүматлары күрсәткәнчә, олыларга караганда балалар ел саен 9 тапкырга күбрәк чиргә бирешүчән була. “Тирән сулыш юллары һәм грипп белән авы­ручыларның 65 проценты – балалар”, – ди табиблар.

Февраль-март бар

Шөкер, соңгы вакытта көннәр суык тора. Табиблар әнә шулай дип сөенә. Ник дигәндә, мондый көн­нәрдә инфекция таралу куркынычы кими. Әмма февраль бетә дә кыш китә дигән сүз түгел. Март та шактый салкын көннәре, күз ачмаслык бураннары белән шаккатыра кайчак. Шуңа да грипптан саклану, иммунитетны ныгытуга игътибар бирә торган чак. Аннан организм кыштан соң бераз арып та китә, хәлсезлек барлыкка килә. Орга­низм­ның авыруларга каршы торучанлыгы да кими. “2015 елга куелган фаразларыбыз акланды. Февраль уртасыннан Россиядә грипп белән авыручылар саны арта башлады. Илнең 29 төбәгендә грипп­ның эпидемия чигеннән узуы күзә­телә. Март урталарында авыручылар саны кими башлар дип көтә­без”, – дип өметләнә Марина Патяшина. Соңгы атнада тирән су­лыш юллары инфекциясе һәм грипп белән авыручы 26 мең кеше теркәлгән. Гыйнвар башыннан авыручылар саны 100 мең кешедән арта. Әлегә 19 грипп очрагы исәпкә алынган. Узган ел грипп диагнозы 135 кешегә куелган булган.

Белеп тор!

Табиблар бу чорда игътибарлы булырга куша. Өйдә авыру бар икән, аны мөмкин кадәр башкалардан аерым карарга кирәк. Аерым бүлмә булса, тагын да яхшырак. Идәнне көнгә ике мәртәбә юеш чүп­рәк белән сөртеп алырга, җил­лә­тергә кирәк. Грипп һәм тирән сулыш юллары вируслы инфекция­ләрен йоктырмас өчен кеше күп йөри торган урыннарга бармаска киңәш ителә. Витаминга бай ризык­лар ашагыз. Бигрәк тә С витаминлы ризыклар, суган, сарымсак, лимон, кара карлыганны көн саен кулланыгыз. Балан, мүк җиләге төнәтмәләре ясап эчегез. Даруха­нәләрдән махсус витаминнар, вируска каршы препаратлар алыгыз. Болар барысы да авыруга каршы көрәшергә көч өсти. Саф һавада булыгыз, эш белән ялны аралаштырыгыз.