Россиядә яңа бәйрәм – Әтиләр көнен гамәлгә кую мәсьәләсе янә кузгатыла

“Россиядә даими рәвештә гаилә гореф-гадәтләрен һәм кыйммәтләрен популярлаштыруга багышланган чаралар үткәрелә. Шулай да, РФ Президенты карары нигезендә, Әниләр көне генә дәүләт дәрәҗәсендә билгеләп үтелә. Шул ук вакытта кайбер субъектларда төбәк бәйрәме буларак Әтиләр көне үткәрелә. Аны Россия күләмендә кертү ата булуның дәрәҗәсен күтәрүгә, ир-егетләрдә бала тәрбияләүгә кайгыртучан мөнәсәбәт булдыруга китерәчәк”, – дип аңлата РФ Хезмәт һәм социаль яклау министрлыгы матбугат хезмәте.

Бүген Әтиләр көне – Халыкара бәйрәм. Аны дөньяның 50дән артык илендә, шул исәптән АКШта, Бөекбританиядә, Франциядә, Германиядә, билгеләп үтәләр. Әтиләр көнен үткәрүнең бердәм датасы юк. Хәзерге вакытта Россиядә бу көн дәүләт дәрәҗәсендә теркәлмәгән, әмма күп кенә төбәкләрдә ул җирле закон нигезендә беркетелгән. Мәсәлән, Волгоград, Курск, Липецк, Ульяновск өлкәләрендә Әтиләр көне 2005 елдан бирле билгеләп үтелә. Бу көнне федераль дәрәҗәдә бәйрәм итү турында инде 7 елга якын сөйләшүләр алып барыла. Беренче тапкыр РФ Президенты Владимир Путин 2008 елда бу хакта уйлап карарга тәкъдим иткән иде. Соңрак әлеге сөйләшүләр тукталды. 2012 елда башкала хакимияте кабат әлеге тәкъдим белән чыкты, әмма берни дә хәл ителмәде.