Актанышта ТАССРның 100 еллыгына багышланган чаңгы эстафетасы узды
19 гыйнвар көнне Актанышта ТАССРның 100 еллыгына багышланган чаңгы эстафетасы “Бүләк” чаңгы базасында узды.
Спорт ярышын тантаналы ачып, Актаныш район башлыгы Энгель Фәттахов
оешма-предприятиеләр, мәгариф учреждениеләре һәм авыл җирлекләре командаларына уңышлар теләде. Туган көнен билгеләп үтүче спорт ветераны Илфат Иманаевка истәлек бүләге тапшырды.
Һәр командадан 2 ир-ат, 2 хатын-кыз катнашкан эстафета киеренке барды. Һәр чаңгычы үз командасының җиңүе өчен җитезлек һәм югары техника кулланды.
Оешма-предприятиеләр, учреждениеләр арасында беренче урынны хакимият командасы яулады. Икенчедә – үзәк хастаханә, өченчедә – эчке эшләр бүлеге, автотранспорт предприятиесе.
Авыл җирлекләре арасында беренче урынны Киров җирлеге яулады. Икенче урында – Актаныш авыл җирлеге.
Мәгариф учреждениеләре арасында беренче урынны Актанышның 2 нче мәктәбе яулады. Икенче урында – Актанышның 1 нче, өченче урында - технологик техникум.