Авыл юбилее

Бәйрәм чарасының программасы бик тыгыз булды. Мәдәният йортында узган бу кичә видеосюжет белән башланып китте. Җирлек башлыгы Рәйхан Фелүс кызы Галимянова халыкны бәйрәм белән котлап изге теләкләрен ирештерде. Чара барышында авылның үткәне хакында тирән эчтәлекле информация бирелде. Мәчет, мәктәп, мәдәният, колхоз тарихларына һәм ул өлкәләрдә тырыш хезмәткәрләр искә алынды. Район мөхтәсибе Руслан хәзрәт авылыбызда мәчет ачылуның 20 еллыгы уңаеннан аллаһ йортына ярдәм күрсәтеп торучыларга Рәхмәт хатлары тапшырды..Авылыбызда туып-үскән күренкле шәхесләр кунак итеп чакырылган иде. Физика-математика фәннәре кандидаты Р.Шакиров, техник фәннәр кандидаты С. Салихҗанова, ТР атказанган агрономы М.Мостафин. ТР. атказанган артисты А.Харисова, ТР атказанган мәдәният хезмәткәре Робсон Мусин, БР атказанган мәдәният хезмәткәре Джон Мусин, С.Сөләйманова исемендәге әдәби премия лауреаты, шагыйрә Әлфия Ситдыйковалар сәхнәгә күтәрелеп кичерешләре белән уртаклаштылар. Төрле өлкәләрдә зур урыннар биләүче якташларыбыз да бу чараның кадерле кунаклары булды.Бәйрәм чарасы үзебезнең җирлктә туып-үскән сәләт ияләренең концерт номерлары белән аралашып барды. Кичәнең икенче өлешендә Рафак Зариповның "Имәннәр шаулый"  китабы тәкъдир ителде. Күп авылдашларыбызның язмышын үз эченә алган әлеге китап тамашачыларда зур кызыксыну уятты.Авылыбызның үткәненә багышланган бу бәйрәм чарасыннан тамашачылар зур тәэсирләр белән таралышты.