Уразай мәктәбе яңалыклары
Татар халкының иң күңелле язгы бәйрәмнәренең берсе - Карга боткасы. Электән-элек кешеләр җирдә язның нилектән булганын белмәгәннәр, аны җылы яктан каргалар алып килә дип уйлап, гөрләвекләр ага башлагач, каргалар килгәч, алар хөрмәтенә “Карга боткасы” дигән бәйрәм ясаганнар. Әби-бабаларыбыз бала вакытта матур итеп киенеп, өйдән-өйгә кереп, ярмалар, йомыркалар җыеп, изге теләкләр теләп, авыл халкын бәйрәмгә чакырганнар. Су буйларында, аланнарда казан асып, ботка пешкәнче уйнап-җырлап, такмак әйтешкәннән соң, бергәләп ботка ашаганнар, калганын каргаларга дип җир өстенә сипкәннәр.
Ә әти-әниләребез, тау битләре кардан ачылгач, төркем-төркем булып, малайлар, кызлар аерым-аерым ботка пешереп ашауларын, бер-берсе белән кемузардан йөгерешеп ярышуларын бүген дә бик сагынып сөйлиләр.
Без дә мәктәптәптә әлеге бәйрәмне елдагыча уен-көлке, кызыклы уеннар, төрле спорт ярышлары белән бик күңелле итеп билгеләп уздык. Башлангыч сыйныф укучылары тарафыннан уздырылган Карга боткасы йоласы да бик матур, эчтәлекле булды. Бәйрәмнәр белән барчагызны!