Сыйфаты да яхшы, бәясе дә арзан

2015 елның 9 октябре, җомга

Хәзерге вакытта Татарстанда авыл хуҗалыгы ярминкәләренең гөрләгән чагы. Районнар сыйфатлы азык-төлек белән Казан һәм Чаллы халкын гына тәэмин итеп калмый, шундый ук чаралар район үзәкләрендә дә оештырыла. Бу аңлашыла да, район җирлекләрендә мал-туар асраучылар саны кимү аркасында биредә авыл хуҗалыгы продукциясенә ихтыяҗ барлыкка килә...


Соңгы елларда авыл хуҗалыгы ярминкәләре халык арасында аеруча популярлашты. Биредә тәкъдим ителгән продукциянең сыйфаты да кибетнеке белән чагыштырганда күпкә яхшырак. Бәяләрнең базардагыдан арзанрак булуы исә бу проектны социаль юнәлешле дә итә.

Дәүләт ярдәмгә килә

Моның шулай икәнлеген Татарстанның авыл хуҗалыгы һәм азык-төлек министры Марат Әхмәтов та әледән-әле ассызыклый.

- Ярминкәләр ярдәмендә табыш алу, акча эшләү максаты куелмый. Биредәге бәя кибетләрдәге кебек үк булса, аның кирәге дә калмас иде... Әлбәттә, мин ярминкәгә сату итәргә килүчеләрне дә яхшы аңлыйм. Алар моңа ике көн әзерләнә. Кичтән чыгып китәләр, төне буе юлда. Шул рәвешле, шимбә көнне иртәнге биштән шәһәр халкына хезмәт күрсәтә башлыйлар. Аннан оешып кайтып китәргә дә кирәк бит әле. Бу – бик мәшәкатьле эш. Моның шулай булуын республика Президенты да яхшы аңлый. Шуңа күрә безнең һәр мөрәҗәгатьне тыңлап, ярдәм итәргә тырыша, - дигән иде министр авыл хуҗалыгы тармагына нәтиҗәләр ясауга багышланган матбугат конференциясендә.

Җаваплы идарәчелек тә ярминкәләрдә катнашучы хуҗалыкларга ярдәм кулы суза. Мәсәлән, быел аның күләме 10 миллиард сумга җитеп килә инде.

- Узган ел без транспорт чыгымнарын компенсацияләгән идек. Быел сентябрь ае нәтиҗәләре буенча 5,6 миллион сум күләмендә компенсация исәпләп чыгардык. Ул хуҗалыкларның нинди ераклыктан килүенә бәйле рәвештә санала. Болардан тыш, ярминкәләрдә аеруча актив катнашкан предприятие, хуҗалык, җирлекләрне акча белән кызыксындырабыз. Анысы шулай ук аена 5 миллион сум тирәсе җыела, - ди министр.

Әйтергә кирәк, бу – беренче карашка гына зур сумма кебек тоела.

- Кагыйдә буларак, ярминкәләргә атна саен якынча 700 транспорт чарасы килә. Чараларда 3-4 мең кеше катнаша. Шул рәвешле, бүлә башлагач, бу акча әллә ни зур түгел, - ди Марат Әхмәтов.

Сарман халкы сөенә

Районнардагы җитәкчеләр исә ярминкәләргә зур игътибар бирә. Бактың исә, алар сыйфатлы азык-төлек белән Казан һәм Чаллы халкын гына тәэмин итеп калмый, үз районы халкы өчен дә шундый ук чаралар оештыра икән. Күп районнарда бу инде күркәм гадәткә әверелсә, кайберләрендә андый ярминкәләр турында “традицияләрне яңарту” дип әйтергә мөмкиндер. Мәсәлән, Сарман районы - шуларның берсе.

- Сарман үзәгендә ярминкә оештырыла дигәч, бик сөендек. Элегрәк була иде кебек, тик узган ел да, аннан алдагы елда да район үзәгендә мондый чараның үткәрелүен хәтерләмим. Быел исә аеруча зурлаганнар – ярминкәдә ни генә юк. Күпфатирлы йортта яшәгәч, бакча да, мал да тотып булмый бит. Яшь тә бара. Бу чара алга таба да оештырылса, бик яхшы булыр иде, - ди Сарманда яшәүче Әлфия Гәрәева. Ул бирегә сөт, ит һәм йомырка алу өчен махсус килгән.

Чыннан да, биредә халыкка арзан бәядән азык-төлек кенә түгел, ә терлек азыгына кадәр тәкъдим ителгән.

- Фураж сатабыз, салам, печән дә бар. Кирәк икән, тирес белән дә тәэмин итәргә әзербез. Атна дәвамында гаризалар кабул итәбез, - ди Сарман районының авыл хуҗалыгы идарәсе җитәкчесе Альберт Шәрипов.

Районда ярминкәләр Сарманнан тыш, Җәлил бистәсендә дә үткәрелә. Иң кызыгы: биредә сатып алучылар Чаллыга караганда күбрәк тә.

- Беренче чиратта, бу – зур шәһәрдә сатучыларның күп булуы белән аңлатыла. Анда ассортимент та күпкә баерак, - дип белдерде җитәкче.

Кош-корт ярминкәсе нинди була?

Актаныш районында исә ярминкәләр уздыру инде күптән күркәм гадәткә әверелгән.

- Минем өчен ярминкәнең ике бик зур әһәмияте бар. Беренчесе – халыкны сыйфатлы, арзан азык-төлек белән тәэмин итү булса, икенчесе – җитештерүчеләрне базар шартларында сатарга, үз продукцияләрен тәкъдим итәргә өйрәтү. Аннары бу ярминкәләр хуҗалыкларның көндәлек кеременә дә беркадәр уңай йогынты ясый, - ди Актаныш районының авыл хуҗалыгы идарәсе җитәкчесе Дәниф Харисов.

Районның үзендәге ярминкәләргә килгәндә, алар ел саен бер үк вакытта – Өлкәннәр көнендә башлана икән. Бу традициянең инде 30 еллап бозылганы юк, ди Дәниф әфәнде.

- Бу көн бездә Өлкәннәр көне генә түгел, ә ярминкәләр башлану датасы да. Авыл хуҗалыгы хезмәткәрләре көне уңаеннан да махсус ярминкә үтә, - дип сөйләде җитәкче.

Тагын бер кызыклы мәгълүмат – биредә кош итү сату ярминкәләре дә үткәрә башлаганнар.

- Бу ярминкәдә бары тик кош ите генә сатыла: каз, үрдәк, күркә - барысы да бар. Анда фермер хуҗалыклары белән беррәттән шәхси хуҗалыклар да актив катнаша. Соңгы елларда районда бу тармак шактый үсеш кичерә башлады, - дип ассызыклады Дәниф Харисов.

 


Рәмзия ЗАКИРОВА

 
 
http://intertat.ru/
БАРЛЫК ЯҢАЛЫКЛАРНЫ УКУ
ЯҢАЛЫКЛАРГА ЯЗЫЛУ
Район турында
Документлар
Матбугат хезмәте
Гражданнар мөрәҗәгате
Телефон: (85552) 3-44-14, 3-44-44
E-Mail: Mail.Aktanish@tatar.ru
Без социаль челтәрләрдә:
Сорау бирү
Обычная версия
Сайттагы барлык материаллар лицензия буенча тәкъдим ителә:
Creative Commons Attribution 4.0 International