Шәхси ярдәмчел хуҗалыклар: мал санын киметергә түгел, арттырга

2015 елның 26 августы, чәршәмбе

Соңгы вакытта шәхси ярдәмчел хуҗалыкларда мал санын киметү кирәклеге белән бәйле сөйләшүләрне федераль дәрәҗәдә шактый еш ишетергә туры килә. Россиянең кайбер субъектлары терлек санын азайту өстендә эшләгәндә, Татарстанда, киресенчә, шәхси ярдәмчел хуҗалыкларны үстерү, камилләштерү турында сөйләшәләр...


Хәтерләсәгез, шәхси ярдәмчел хуҗалыкларда мал санын киметү турындагы сөйләшүләр август башында барлыкка килгән иде. Авыл хуҗалыгы тармагы үсешенә багышланган киңәшмә барышында Ставрополь крае губернаторы шәхси ярдәмчел хуҗалыклардагы мал саны буенча махсус чикләүләр кертү тәкъдиме белән чыкты. Әлеге төбәк вәкилләре фикеренчә, кайбер хуҗалыкларда терлек шул дәрәҗәдә күп ки, алар күршеләренә шактый уңайсызлыклар тудыра. Санитар таләпләр турында да онытырга ярамый, имеш.  Ул чагында Россия Премьер-министры Дмитрий Медведев Авыл хуҗалыгы министрлыгына әлеге мәсьәлә буенча тиешле карарлар кабул итәргә боерган иде...

Кирәксез сөйләшүләр...

Россия төбәкләрендә шәхси ярдәмчел хуҗалыкларда мал санын киметү турында сөйләшсәләр, Татарстанда исә бу тармакка аеруча зур өметләр баглана. Биредә, киресенчә, терлек һәм кош санын арттыру буенча берсеннән-берсе мөһимрәк карарлар кабул ителә. Бу аңлашыла да, чөнки авыл хуҗалыгы продукциясенең шактый өлеше нәкъ менә шәхси ярдәмчел хуҗалыкларга туры килә. Мәсәлән, 2014 елда авыл хуҗалыгы продукциясенең 53,6 процентын алар җитештергән.

- Россиянең кайбер төбәк җитәкчеләре тарафыннан кертелгән шәхси ярдәмчел хуҗалыкларда мал санын киметү белән бәйле тәкъдимнәр бик күп кирәксез сөйләшүләргә сәбәп булды. Без исә, киресенчә, шәхси ярдәмчел хуҗалыклар ярдәмендә продукция җитештерүне арттыру турында сөйләшәбез. Бу максатка ирешү өчен  әлеге тармакка ярдәм күләмен арттыру мөһим, - дип белдерде Татарстан Дәүләт Советының экология, табигатьтән файдалану, агросәнәгать һәм сәүдә сәясәте комитеты рәисе Таһир Һадыев авыл хуҗалыгының кече формаларын үстерүгә багышланган “түгәрәк өстәл”дә.

Авыл халкының тормышын яхшырту өчен

Җитәкче сүзләрен Татарстан Авыл хуҗалыгы министры урынбасары Ришат Хәбипов та хуплады.

- Агросәнәгать тармагындагы бу өлкәләрне камилләштерү табыш күләмен арттыру, авылларда гомер итүчеләрнең тормыш дәрәҗәсен яхшыртуда зур роль уйный. Шуңа күрә Татарстанда шәхси ярдәмчел хуҗалыкларда мал санын киметү турында сүз дә булуы мөмкин түгел, - дип белдерде ул.

Билгеле булганча, хәзерге вакытта Татарстанда 4,7 мең крестьян-фермер һәм 400 мең шәхси ярдәмчел хуҗалык бар. Аларга ярдәм итү максатыннан бүлеп бирелгән акча күләме якынча 2 миллиард сум тәшкил итә. Республикада шәхси ярдәмчел хуҗалыкларга ярдәм итүнең яңадан-яңа ысуллары эзләнә. Мәсәлән, тиздән аларга дәүләт ярдәме күрсәтүне күздә тота торган яңа закон кабул ителәчәк. Канун шәхси ярдәмчел хуҗалыкларга финанс ярдәменең күләмен арттырыр һәм шул рәвешле аларның үсешенә тагын да зуррак этәргеч ясар, дип фаразлый белгечләр.

 


Рәмзия ЗАКИРОВА

Чыганак: http://intertat.ru
БАРЛЫК ЯҢАЛЫКЛАРНЫ УКУ
ЯҢАЛЫКЛАРГА ЯЗЫЛУ
Район турында
Документлар
Матбугат хезмәте
Гражданнар мөрәҗәгате
Телефон: (85552) 3-44-14, 3-44-44
E-Mail: Mail.Aktanish@tatar.ru
Без социаль челтәрләрдә:
Сорау бирү
Обычная версия
Сайттагы барлык материаллар лицензия буенча тәкъдим ителә:
Creative Commons Attribution 4.0 International