Рөстәм Миңнеханов Татарстан Президенты вазыйфаларын башкаручы итеп билгеләнде
Владимир Путин очрашу барышында Татарстан Республикасының соңгы биш елдагы үсешен югары бәяләде. “Соңгы елларда Сезнең җитәкчелектә республика ирешкән нәтиҗәләр Россия Федерациясендә иң яхшылардан, – диде Владимир Путин. – Эшегездәге югары темплар арта барыр дип ышанам”.
Төбәк җитәкчесе вазыйфаларын 2015 елның сентябрендә Татарстан Республикасы Президенты сайлауларына кадәр үтәвегезне сорыйм, диде Владимир Путин, Рөстәм Миңнехановка мөрәҗәгать итеп. Үз чиратында Рөстәм Миңнеханов Владимир Путинга ышанычы өчен рәхмәт белдерде. Ул Татарстан Республикасын социаль-икътисадый үстерү турында мәгълүмат бирде, кайбер юнәлешләр хакында җентекләбрәк сөйләде.
Россия Президенты Владимир Путин “Татарстан Республикасы Президенты вазифаларын башкаручы турында”гы указны имзалады, дип хәбәр итә Кремльнең матбугат хезмәте. Дәүләт башлыгы сайтында урнаштырылган документ тексты нигезендә, Рөстәм Миңнеханов вәкаләтләре вакыты чыгуга бәйле рәвештә, Татарстан Республикасы Президенты итеп сайланган зат үз вазифасына керешкәнче, вакытлыча Татарстан Республикасы Президенты вазифаларын башкаручы итеп билгеләнә.
Кичә Рөстәм Миңнеханов Мәскәүдә World Skills International (WSI) оешмасы вәкилләре белән уздырылган очрашуда да катнашты. Ил Президенты Владимир Путин уздырган очрашу WSI халыкара комиссиясенең Россиянең 2019 елдагы WorldSkills Competition Дөнья чемпионатын үткәрүгә әзерлеген ачыклауны максат иткән инспекцион сәфәре кысаларында уза. Владимир Путин йөкләмәсе буенча Россия Федерациясе һөнәри осталык җәһәтендә халыкара ярышлар үткәрүгә гаризаны 2015 елның гыйнварында бирде. Безнең гариза өстен дип табылса, ярышлар Казанда узчак. Оештыручылар Татарстан башкаласын сайлаган очракта, Владимир Путинның бу чарага киләчәген әйтте.
Рөстәм Миңнеханов Мәскәүдә Россия Банкы рәисе Эльвира Нәбиуллина белән дә очрашты. Очрашу вакытында берничә килешү имзаланды. Аның берсе – бердәм формат нигезендәге кредит булмаган финанс оешмаларының электрон хисап тоту проектын тормышка ашыру килешүе. Бу эшне беренче булып Татарстанда сынап карамакчылар.