Барысын да яратырга кирәк

Оптимист булыйк

Кризис елы булганлыктан, иң элек журналистлар Рөстәм Миңнехановка рес­публика бюджеты турында сорау бирде. Президент әй­түенчә, Татарстан кабул ител­гән бюджетын һәм инвестицион программаларын сак­лап калачак (әйтик, элег­рәк “Смарт Сити Казан” проектын ябып тору ихтималы турында фикерләр ишетел­гәләде). “Санкцияләр, банк­ларның мөшкелрәк хәлдә калуы, нефть бәяләренең тү­бән­гә тәгәрәве күңелебездә билгеле бер борчу тудыра, әлбәттә. Тик, миңа калса, бик начар булачак, дип, барыннан да элек үзебезне үзебез үк куркытабыз”, – дип бил­геләп үтте Рөстәм Миң­неханов. – Әлбәттә, борчылырга урын юк, дип әйтеп булмый, проблемалар бар. Әмма без аларның барысын да хәл итәчәкбез. Оптимист булырга кирәк”. Президент хезмәт хакларын, бюджет учреждениеләре чыгымнарын, инвестицияләрне, юллар төзү, күпфатирлы йортларны, балалар бакчаларын төзекләндерү проектларын “кисәргә” ярамаганлыгын ис­кәртте. Предприятиеләр хезмәткәрләре санын кыс­картуга килгәндә: “Хезмәт­кәрләрне эшләрен­нән җи­бәрергә була анысы. Тик ярты яки бер ел узганнан соң белгечләрне кайдан алырбыз?” – дип, республика җи­тәкчесе хезмәт коллективларын, эш урыннарын саклап калырга кирәклеген әйтте.

“Ана капиталы”н  – депозитка?

Журналист ханымнар, әлбәттә, “Ана капиталы” программасын да читләтеп үт­мәде. “Аны нишләп депозитка салу турында уйламыйлар икән? Хәзер банкларда кер­темнәрне ими­ниятләш­терү дәрәҗәсе югары бит”, – ди­гән сорауга Президент, чыннан да, бу хакта депутатларга тәкъдим белән чы­гу­ның зыян итмәя­чәген бил­геләп үтте. Моннан тыш ул әлеге про­грамманың 2016 елда төгәл­ләнүенә кагылып: “Россия кебек гаять зур илгә демографик вазгы­ятьнең уңай булуы кирәк. Ә моның өчен “Ана капиталы” гына түгел, ярдәм итүнең башка төр­ләрен дә уйлап табу мө­һим. Илебез җитәк­че­легенең сабыйларның күб­рәк тууы һәм аларны белемле, көн­дәшлеккә сәләтле итеп үсте­рүгә шартлар тудыру өчен нинди дә булса юллар эзләп табасына ышанам”, – диде.

Гомумән, гүзәл затлар­ның ТР Президентына би­рел­гән сораулары төрле темаларны колачлады. 2015 ел – Парк һәм скверлар елы, 2030 елга кадәр Татарстан­ның социаль-икътисадый үсеш стратегиясе, Кырым­ның Россиягә кушылуына бер ел тулу, табибларны башка төбәкләрдән китерү... Журналист ханымнар республика җитәкчесеннән, шә­һәр һәм авыл хатын-кызлары арасында аерма бармы-юкмы, дигән сорауга да җа­вап табарга тырышты хәтта. “Чибәрлектә – юк. Яшәү шартларында – бар. Авылда яшәү авыррак, әлбәттә. Анда шәһәрдәге кебек шартлар юк әле. Тик без бу мәсьәлә өстендә бик нык эшлибез, күп кенә программаларыбыз шуңа юнәлдерелгән, – дип җавап бирде Рөстәм Миңнеханов. – Гомумән, ха­тын-кызларны шәһәрнеке һәм авылныкына бүлү дөрес түгел. Аларның барысын да яратырга кирәк”.