Актанышлылар белергә тиеш

Россия Иҗтимагый палатасы вәкилләре, составында шикәр булган газлы эчемлекләр җитештерү, тарату, куллануны җайга салып, газлы суны мәгариф һәм медицина оешмаларында сатуны тыярга тәкъдим иткән.

Медицина хезмәтләре күр­сәтү һәм сәламәтлекне саклауга бәйсез мониторинг буенча “Здоровье” фонды директоры Эдуард Гаврилов сүзләренә караганда, бер яктан, газлы эчемлекләрдә әллә ни куркыныч компонентлар юк. Ләкин “гази­ровка”ны күп­ләп куллана башлагач, аның ярдә­мендә организмга кергән шикәр күләме нормадан артып китә. Өстәвенә, газлы суны даими кулланган бала файдалы эчемлекләрдән бизә.

Россиянең дәлилләүче медицина җәмгыяте белгеч­ләре тарафыннан май аенда уздырылган тикшеренү нә­ти­җәләреннән күренгәнчә, без­нең илдә соңгы 30 ел эчендә симерү һәм артык авырлыктан интегү­челәр саны 17 проценттан 23 процентка җит­кән. Россиядә елына 3,3 миллиард литр газлы су җи­теш­терелә. Бу – җан башына 23шәр литр газлы эчемлек туры килә дигән сүз. “Балалар һәм яшүс­мерләр арасында симе­рүчеләр саны 7 процентны тәшкил итә, артык авырлыктан интегүче­ләр саны исә 20 процентка җиткән”, – ди профессор Василий Власов. Тик­шеренү уздырган авторлар­ның берсе, доктор Булат Идрисов исә бала­ларның яшьли симерүенә бармак аша карамаска чакыра. “Ба­ла­ларның симерүе йөрәк-кан тамырлары, шикәр авырулары, яман шешнең бик күп төрләрен китереп чыгарырга мөмкин”, – дип кисәтә ул.

Табиб сүзләреннән аң­лашылганча, 7 яшькә кадәрге балалар – көненә 9 чәй кашыгы, 18 яшькә кадәрге яш­үсмерләр 15 чәй кашыгыннан да артыграк шикәр кулланмаска тиеш. Моңа эчем­лектә, тәм-том, камыр ризыклары составында булган шикәр дә керә. 330 миллиметрлы бер банка газлы суда исә 8 чәй кашыгы шикәр бар. Димәк, ярты литр газлы су эчкән бала көнлек норманы 1,5 тапкыр арттыра булып чыга.

(“Ватаным Татарстан”,   /№ 139, 24.09.2014/)