Актаныш ЗАГСында «Гаилә» милли проекты кысаларында Әниләр көненә багышланган чара узды
Актаныш ЗАГСында «Гаилә» милли проекты кысаларында Әниләр көненә багышланган «Гаилә мәктәбе» тәрбия сәгате узды. Чараның төп максаты-кеше тормышында ананың ролен күтәрү.
Актанышның 1 нче санлы мәктәбенең югары сыйныф укучылары Гаилә кыйммәтләренең мөһимлеге һәм әниләрне хөрмәт итү турында әңгәмәдә катнаштылар. Очрашу барышында алар гаилә тормышы белән бәйле традицияләр һәм кыйммәтләр турында белемнәрен киңәйттеләр.
Имам-мөхтәсиб Руслан хәзрәт Мортазин үз чыгышында һәр кешене гомер буе озатып йөрүче ана мәхәббәтенә һәм сабырлыгына басым ясады.
Чарада ЗАГС мөдире Гөлфинә Мөхәммәдиева һәм районның өлкән психологы Фәһимә Шәйгарданова катнашты. Укучылар шулай ук әниләре турында күңелне нечкәртерлек сүзләр белән уртаклашып, үз хисләрен белдерделәр.
Күңелле һәм җылы атмосферада катнашучылар үзләренең туганнары һәм якыннары турында кайгыртуның никадәр мөһим булуын аңлый алдылар. Актаныш районының барлык аналарын якынлашып килүче бәйрәм белән котлау сәгате тәмамланды.