Район башлыгы тернәкләндерү үзәген булдыру инициативасын хуплады
Бүген Актаныш районы башлыгы Ленар Зарипов күптән түгел ачылган беренче ярдәм күрсәтү бүлегендә булды. «Дәвамлы һәм актив тормыш» милли проекты кысаларында төзелгән яңа бина оператив һәм квалификацияле беренче ярдәм күрсәтү өчен кирәкле барлык әйберләр белән тәэмин ителгән. Бу фактор районның ерак торак нокталарында яшәүчеләр өчен аеруча мөһим.
Актаныш үзәк район хастаханәсе баш табибы Айдар Хаев белән берлектә Ленар Зарипов шулай ук бала тудыру бүлегенең һәм стационарның торышын бәяләде. Үзәк район хастаханәсенең бу канаты ремонт һәм реконструкция үткәрүне таләп итә.
Очрашуның төп моменты махсус хәрби операциядә катнашучылар өчен тернәкләндерү үзәген ачу перспективалары турында фикер алышу булды. Айдар Хаев район башлыгы белән, кайнар нокталардан кайткан хәрбиләргә комплекслы ярдәм күрсәтәчәк үзәк булдыру планнары белән уртаклашты. Ленар Зарипов әлеге инициативаны тулысынча хуплавын белдерде, ил мәнфәгатьләрен яклаучыларга ярдәм күрсәтүнең мөһимлеген ассызыклады. Бу проектны гамәлгә ашыру Актаныш районында ветераннарга ярдәм итү системасында мөһим адым булачак.