Район мәдәният йортында бүген Актаныш технология техникумын тәмамлаучыларга дипломнар тапшыру тантанасы узды
Район мәдәният йортында бүген Актаныш технология техникумын тәмамлаучыларга дипломнар тапшыру тантанасы узды. Быел 76 яшь белгеч район һәм республика үсешенә үз өлешләрен кертергә әзерләнеп, тормышка юллама алды.
Укучыларга сәламләү сүзе белән Актаныш районы башлыгы Ленар Зарипов мөрәҗәгать итте. Ул кичәге студентларны укуларын уңышлы тәмамлаулары белән чын күңелдән котлады, алган белемнәре һәм һөнәри күнекмәләре киләчәктә карьера үсеше өчен ышанычлы нигез булачагын билгеләп үтте.
Ул ассызыклаганча, Актаныш технология техникумы сыйфатлы белем генә биреп калмый, үз студентларында патриотизм хисе дә тәрбияли. Район башлыгы бигрәк тә хәзер махсус хәрби операциядә катнашып,Ватанга тугрылыкларын исбатлаган чыгарылыш сыйныф укучыларының өлешләрен билгеләп үтте.
Тантаналы шартларда дипломнар районның әйдәп баручы авыл хуҗалыгы предприятиеләре җитәкчеләренең алкышлары астында тапшырылды. Алар чыгарылыш сыйныф укучыларын котладылар һәм яшь белгечләрне үз коллективларына кабул итәргә әзер булуларын белдерделәр, аларга кызыклы һәм перспективалы вакансияләр тәкъдим иттеләр.
Укучылар, үз чиратларында, техникум укытучыларына алган белемнәре һәм теләкләре өчен рәхмәт белдерделәр, Актаныш технология техникумын тәмамлаучы исемен лаеклы алырга вәгъдә иттеләр.