Рөстәм Миңнеханов Төзүчеләр көне уңаеннан бәйрәм чарасында катнашты

11 август көнне Төзүчеләр көне уңаеннан оештырылган бәйрәм чарасында Татарстан Республикасы Президенты Рөстәм Миңнеханов катнашты. Тантана Сабантуй формасында Казанның Идел буе районындагы Каенлыкта узды. Кунак һәм катнашучыларны Сабантуйның гадәти капкасы каршы алды, ул бу юлы ике экскаватор чүмечләрен кара-каршы югары күтәргән рәвештә ясалган иде.
Рөстәм Миңнеханов һәм аны озата баручы затлар төрле компанияләр тәкъдир ителгән күргәзмә белән танышты. Республика муниципаль районнары оештырган иҗади мәйданчыкларны карап чыкканнан соң, вакыйга төзелеш өлкәсе хезмәткәрләре өчен Сабантуйның төп мәйданына күчте.
Бәйрәм театральәштерелгән прологтан башланып китте, ул төзүчеләр профессиясенә багышланган иде. Бәйрәмдә тармакның ветераннарын сәламләделәр, Татарстан Республикасы һәм Россиянең атказанган төзүчеләрен. Ветеран-төзүчеләрнең берсе яшь буынга, төзелеш техникумын тәмамлаучыларга һөнәр символы - эшче көрәкчеген тапшырды.
 Төзүчеләрне аларның профессиональ бәйрәме белән котлау сүзендә Рөстәм Миңнеханов республиканың төзү комплексы эшчәнлегенең нәтиҗәләре турында әйтте. Тармакның иң яхшы хезмәткәрләренә Татарстан Республикасы Президенты дәүләт бүләкләрен тапшырды. «Фидакарь хезмәт өчен» медальләр тапшырылды, "Татарстан Республикасының атказанган транспорт хезмәткәре", "Татарстан Республикасының атказанган төзүчесе" , "Татарстан Республикасының атказанган газ тармагы хезмәткәре" исемнәре белән бүләкләнделәр, Татарстан Республикасы Президентының Рәхмәт хатлары тапшырылды.
Мәскәү мэрының шәһәр төзелеше сәясәте һәм төзелеш мәсьәләләре буенча урынбасары вазыйфаларын башкаручы Марат Хөснуллин бүген бәйрәмдә мөхтәрәм кунак булды, ул шулай ук төзүчеләргә хезмәтләре өчен рәхмәт әйтте. Сез башкарып чыккан эш - батырлык ул, дип әйтте Марат Хөснуллин, мин Казандагы 2013 елгы Универсиадага әзерлек кысаларында төзелгән об]ектларның сыйфатына, күләменә таң калдым. Аның сүзләренчә, Татарстан Республикасы Президенты Рөстәм Миңнехановның бетмәс-төкәнмәс энергиясе аркасында республиканың төзелеш комплексы шундый зур күләмдә алып барыла һәм шундый югары дәрәҗәгә ирешә алган. Ул бүген Мәскәүдәге төзелеш объектларында хезмәт итүче төзүчеләргә Мәскәү Хөкүмәте исеменнән бүләкләр тапшырды.
Бәйрәм зур фейерверк белән тәмамланды.