СӨЕНЕЧЛЕ ХӘБӘР: Актаныш районының иң яхшы унөч комбайнчысы йөзәр мең сум премиягә ия булды

2020 елның 2 ноябре, дүшәмбе

Август аенда Татарстан Республикасы Авыл хуҗалыгы һәм азык-төлек министрлыгы  «Татарстан Республикасы агросәнәгать комплексының иң яхшы комбайнчысы» конкурсын игълан иткән иде.  

Конкурс комиссиясе республикада һәм район дәрәҗәсендә иң күп суктырылган ашлык һәм иң күп чабылган мәйдан күрсәткечләре буенча 200 җиңүчене билгеләде. Белгечләр йөзә мең сум акча алачак.

Шунысы сөенечле, республика дәрәҗәсендәге исемлектә Актаныш районы игенчеләре дә бар.  Тугыз механизаторыбыз  бөртеклеләрне суктыруда,  дүртесе бөртекле культураларны егуда мактаулы күрсәткечләргә ия.

Алар:  

1. “Актаныш” агрофирмасыннан Альберт Шәнгәрәев, икенче төркемдә, ул ДОН -1500 комбайны белән 733 гектардан 2 816 тонна бөртек суктырган;
2. “Актаныш” агрофирмасыннан Равил Мирзаханов, икенче төркемдә, ул МЕГА – 360 комбайны белән 667 гектардан 2 577 тонна бөртек суктырган;
3. “Актаныш” агрофирмасыннан Фоат Дәүләтов, икенче төркемдә, ул ДОН -1500 комбайны белән 651гектардан 2 500 тонна бөртек суктырган;
4. “Актаныш” агрофирмасыннан Ирек Сәлахов, икенче төркемдә, ул МЕГА – 360 комбайны белән 649 гектардан 2 493 тонна бөртек суктырган;
5. “Әнәк” агрофирмасыннан Илмар Хәмзин, икенче төркемдә, ул АКРОС -530 комбайны белән 609 гектардан 3 215 тонна бөртек суктырган;
6. “Әнәк” агрофирмасыннан Марсел Мисбахов, икенче төркемдә, ул АКРОС -530 комбайны белән 456 гектардан 2 422 тонна бөртек суктырган;
7. “Әнәк” агрофирмасыннан Илнар Хафизов, икенче төркемдә, ул АКРОС -530 комбайны белән 432 гектардан 2 314 тонна бөртек суктырган;
8. “Әнәк” агрофирмасыннан Фәнис Сәлахов, икенче төркемдә, ул АКРОС -530 комбайны белән 436 гектардан 2 304 тонна бөртек суктырган;
9. “Саф” хуҗалыгыннан Линар Батыров, икенче төркемдә, ул ДОН -1500 комбайны белән 672 гектардан 2 299 тонна бөртек суктырган;
10. “Актаныш” агрофирмасыннан Айдар Нуртдинов, МАКДОН чапкычы 2 508 гектарда бөртеклеләрне еккан;
11. “Актаныш” агрофирмасыннан Илшат Гизетдинов, МАКДОН чапкычы белән 2 295 гектарда бөртеклеләрне еккан;
12. “Әнәк” агрофирмасыннан Дамир Гыйздатуллин, ДЖОН ДИР чапкычы белән 2 057 гектарда бөртеклеләрне еккан;
13. “Башак” хуҗалыгыннан Фәнил Хәйдәров, чапкычы белән 1 896 гектарда бөртеклеләрне еккан;

Искәртеп үтәбез, уздырыла торган ярышларның объективлыгы өчен техника төркемнәргә бүленгән иде. Барлыгы 4 төркем. Беренчесенә — 140тан 230 ат көченә кадәр, икенчесенә — 230дан 290 ат көченә кадәр, өченчесенә — 300дән 326 ат көченә кадәр, дүртенчесенә 351дән 530 ат көченә кадәр техника керә. Үзйөрешле чапкычлар төркемендә — МакДон, Челенджер, Джон Дир, Нью Холланд, Массей Фергюсон, ЕС-1, КСУ-1, CS-200.

САН: Конкурста агросәнәгать комплексының 1436 хезмәткәре катнашкан, шул исәптән 1298 комбайнчы бөртеклеләрне суктыруда һәм 138 механизатор бөртекле культураларны чаптыруда.