Актаныш муниципаль районы башлыгы Энгель Фәттахов: 13 сентябрьдә узачак сайлауларда Актаныш халкы дөрес фикер кабул итәр (ВИДЕОРЕПОРТАЖ)
Актаныш муниципаль районы башлыгы Энгель Фәттахов Актаныш авылы халкы белән сайлау алды очрашуы уздырды. Белгәнебезчә, бердәм сайлау көне итеп игълан ителгән 13 нче сентябрьдә Татарстан Республикасы Президентын сайлаячакбыз. Татарстан Республикасына президентлыкка биш кандидат теркәлде: "Бердәм Россия»дән – ТР Президенты Рөстәм Миңнеханов, «Үсеш партиясе»ннән – Олег Коробченко, «Гадел Россия» дән – Альмир Михеев, «Россия коммунистлары» фиркасеннән -Альфред Вәлиев, ЛДПРдан-Владимир Сурчилов.
Актаныш муниципаль районы башлыгы Энгель Фәттахов хәзерге вакытта республика белән уңышлы идарә итүче Рөстәм Миңнехановны район башлыгы дәрәҗәсеннән Президент вазыйфасына кадәр үскән Татарстанның Беренче президенты Минтимер Шәймиевнең ышанычлы укучысы дип атады. 1990нчы елларда- илебез тарихында иң тотрыксыз СССР таркалган чорда республиканы таратмый- таркатмый, тынычлык белән дәүләт дәрәҗәсенә күтәргән Беренче Президент Минтимер Шәймиевнең юлын эзлекле дәвам итүче, нинди генә җил-давыллы көннәрдә дә корабны туры алып баручы лидер ул Рөстәм Миңнеханов дип билгеләп үтте үз чыгышында Энгель Нәвап улы. Республикада алып барылган уңышлы сәясәт, икътисадый тотрыклылык хәзер һәр татарстанлының, һәр актанышлының тормышында ачык чагыла. Актаныш районы республиканың бер баласы буларак, уңай күтәрелеш чорында. Район башлыгы Энгель Фәттахов авыл хуҗалыгының игенчелек өлкәсендә ирешелгән уңышларга иркен тукталды.
- Кукуруза культурасын да кертеп, бөртеклеләрдән 200 мең тонна тулай җыем алачакбыз. Бу республикадагы биш иң яхшы күрсәткеч. 183 мең тонна ашлыкны җыеп алдык, күбрәк уңышка өметләнгән идек, әмма язгы культуралар: бодай(35-36 центнер) белән арпаның (39-40 центнер) уңышын яңгырлар киметте. Көзге бодай уртача бер гектардан 51 центнер, борчак 31 центнер уңыш бирде. Бу нәтиҗәләргә карап киләчәккә планнарны формалаштырачакбыз.
- Авыл хуҗалыгында акча кеременең 70 проценты терлекчелеккә туры килә. Иң табышлысы- сөт җитештерү. Бүген Актаныш районы көн саен уртача 200 тонна сөт җитештерүгә йөз тота. Республикада иң күп терлек асрала торган төбәк буларак, 2022 нче елда хуҗалыкларның 250 тонна, шәхси хуҗалыкларның 50 тонна, барысы 300 тонна сөт җитештерү алдагы максат. Бу кадәр сөтне эшкәртергә районның тулы мөмкинлеге бар. Киров авылында тәүлегенә 400 тонна сөт эшкәртә торган сөт комбинаты дөньяның иң заманча ысуллары белән сафка баса. Төзелеш эшләренә 2019 нче елда 800 миллион, 2020 нче елда 900 миллион сум инвестиция җәлеп ителде. Заводның гомуми төзелеш эшләренең суммасы биш миллиардны тәшкил итә.
Актаныш халкының көнкүреш проблемалары республика программаларына нигезләнеп чишелеш ала. Күпфатирлы йортларны ике контурлы газ казаннары белән җылытуга күчерү, чиста су белән тәэмин итү, "Безнең ишегалды" программалары кысаларында Актаныш һәм Киров авылларында күпфатирлы йортлар ишегалларын төзекләндерү- барысы да Татарстан Республикасы Президенты ярдәме белән тормышка ашырыла.
Гадәттән тыш хәлләр министрлыгының район бүлекчәсенә аерым бина салу, техник үсешне булдыру максатында технологик техникумда "Картинг клубы", кванториум, районда ачык картодром, 57нче бистәдә тагын бер мәктәп төзү планлаштырыла. Район үзәк хастаханәсен халык һәм табиблар өчен тагы да уңайлаштыру, базар һәм ресторан территориясен үзгәртеп, сәүдә нокталары, балалар өчен кафелар төзү- якын киләчәктә әлеге планнарның чынбарлыкка әверелүенә дә шаһитлар булырбыз әле.