- МОНДА ГЫНА БАРА ИДЕМ... - ӘТКӘЙГӘ ОПЕРАЦИЯ ЯСАДЫЛАР, РИЗЫК ИЛТӘМ... - БОЛЬНИСКА УКОЛГА БАРАМ...

2020 елның 2 апреле, пәнҗешәмбе

Җәмәгать, мондый сәбәпләр белән урамга чыгу тыела! Таҗлы вирус дигәнең үз кануннарын гамәлгә кертте: Татарстанда үз-үзеңне изоляцияләү шартларында урамда йөрү өчен эш бирүчедән белешмә яки  СМС-пропуск кулда булу шарт . Система 1 апрель төнендә эшли башлады.

Бүген Актанышта маска, перчатка кимичә урамга чыккан бер хатын-кызга полиция хезмәткәрләре һәм “Роспотребнадзор”ның Чаллы шәһәре буенча Актаныш районындагы баш табиб урынбасары Луиза Хафизова тарафыннан саклану чаралары турында аңлатылды.

Ә Чөгәнә авылыннан ике ир-егет пропусксыз автомобиль белән хәрәкәт иткәндә тоткарланды.

Алар административ җәзага тартылды. Рейдка чыкканда, ике сәгать элек, штраф суммасы 100 сумнан 500 сумга кадәр иде.

ӘЛЕ ГЕНӘ ТР МИНИСТРЛАР КАБИНЕТЫННАН ХӘБӘР КИЛДЕ, ҮЗИЗОЛЯЦИЯ ШАРТЛАРЫН ҮТӘМӘГӘН ГРАЖДАННАР 15000 СУМ ТҮЛӘЯЧӘК!!!

РФ Эчке эшләр министрлыгының Актаныш районы буенча бүлеге җитәкчесе Фәһим Нуриев, полиция хезмәткәрләре тарафыннан даими патруль оештырылачагын әйтте. Үзизоляция тикшереп торылачак.

Пропускны активлаштыру өчен 2590 номерына бушлай СМС-хәбәр җибәрергә кирәк. Кыенлык булганда кайнар элемтә телефон номерына шалтыратырга мөмкин: 8-800-250-90-33. Смс-хәбәр җибәрү һәрвакыт бушлай.

Өйдән чыгу өчен махсус рөхсәтне ничек алырга?

• 2590 номерына түләүсез смс-хәбәр җибәрәсез
• Буш урын калдырмыйча түбәндәге текстны язасыз: теркәлү адресы# паспорт сериясе һәм номеры#адрес, фактик яшәү урыны#шәхси мәгълүматны эшкәртүгә рөхсәт бирү
• Җавапка уникаль теркәү коды белән смс-хәбәр киләчәк
• Алга таба «Цель» сүзен язып һәм түбәндәге очракларның берсен сайлап өйдән чыгуның максатын күрсәтеп смс-текст җибәрәсез
• Җавапка рөхсәт коды һәм өйдән чыгуның вакыты күрсәтелгән смс-хәбәр киләчәк. Бу код сезгә тәртип саклаучылар урамда туктаткан очракта күрсәтү өчен кирәк.

Түбәндәге сәбәпләр булганда СМС-пропуск өчен код алырга кирәк:

• Судка бару;
• Балигъ булмаган баланы белем бирү оешмасына илтү, алып кайту;
• Медицина яисә ветеринария оешмасына бару;
• Туганын җирләүдә катнашу;
• Паспорт алу яисә яңадан торгызу;
• Дачага бару, кайту;
• Кредит оешмаларына яисә почта бүлекчәләренә бару;
• Авыру туганнарына дарулар һәм азык-төлек илтү, аларга ярдәм итү;
• Яшәү урынын алмаштыру.

- КАЯН КИЛЕП ЧЫКТЫ БУ АФӘТ?

- КАЙЧАН БЕТӘР БУ КАРАНТИН?

Кулларыннан ут уйната торган ир-егетләр рәсми вәкилләр протокол төзегәндә әнә шулай ачына.

-Үтәр, барысы да уза, яманлык та, яхшылык та. Сабыр итик. Хөкүмәт тарафыннан кушылганны төгәл үтик,- дигән сүзләр генә әйтә алдым.