Татарстанда гриппка каршы 125 мең кеше вакцинацияләнгән

Илкүләм календарь кысаларында барлыгы 800 мең кешегә прививка ясау планлаштырыла

Йогышлы чирләр структурасында 95 процентны биләп торучы грипп һәм кискен респиратор йогышлы авырулар, халык сәламәтлегенә җитди зыян сала. Россия Федерациясендә, шул исәптән, Татарстанда профилактиканың төп чарасы гриппка каршы вакцинациядән гыйбарәт. Бу хакта кичә Татарстан Министрлар Кабинетында узган брифингта сүз барды. Татарстан Республикасы Сәламәтлек саклау министры Айрат Фәррахов хәбәр иткәнчә, 2012 нче елның 1 ноябренә Татарстанга гриппка каршы 328 мең доза “Гриппол плюс” вакцинасы кайтарылган. Шушы көннәрдә чираттагы вакцина партиясе кайтуы көтелә.
Бүгенге көндә вакцина ясату аша 125 мең татарстанлы гриппка киртә куйган, элегрәк хәбәр ителгәнчә, илкүләм календарь кысаларында вакцинацияләүгә барлыгы 800 мең кеше каралган. Айрат Фәррахов ассызыклап узганча, грипп үзе түгел, ә ул китергән өзлегүләр куркыныч. Вакцинаның исә өске сулыш юллары инфекцияләрен киметүе, инфекция дәвамлылыгын кыскартуы һәм авыр өзлегүләрне һәм үлем очракларын кисәтүе ачыкланган. Гриппка каршы вакциналар куллануның икътисади нәтиҗәлелеге, вакцинациягә сарыф ителгән чыгымнардан 10-20 тапкыр артык.
Гриппка бигрәк тә өлкән буын вәкилләре тиз бирешүчән. Шулай ук кискен респиратор авыруларга еш дучар булучылар, мәктәпкәчә яшьтәге балалар, мәктәп укучылары, мөгаллимнәр, медицина хезмәткәрләре, көнкүреш хезмәте, транспорт тармагы вәкилләре өчен грипп аеруча куркыныч. Айрат Фәррахов сүзләренә караганда, гриппка каршы күпләп вакцинацияләү белән колачлау нәтиҗәсендә, авыручыларның санын күпкә киметүгә ирешеп булган. Чагыштыру өчен. 1997-1998 елларда Татарстанда грипп белән 300-400 меңләп кеше авыруы теркәлгән булса, соңгы елларда бу сан 3-4 мең кешене тәшкил итә. Министр барлык оешма җитәкчеләренә, гриппка каршы вакцинация үткәрү максаты белән хезмәт коллективларында актив прививка кампанияләренә керешү үтенече белән мөрәҗәгать итте. Вакцинаның өске сулыш юллары инфекцияләрен киметүе, инфекция дәвамлылыгын кыскартуы һәм авыр өзлегүләрне һәм үлем очракларын кисәтүе ачыкланган. Гриппка каршы вакциналар куллануның икътисади нәтиҗәлелеге, вакцинациягә сарыф ителгән чыгымнардан 10-20 тапкыр артык. “Ничек кенә санасаң да, вакцинациянең гомуми күләме, эшкә чыкмау белән бәйле рәвештә туган чыгымнар һәм дәвалау суммасыннан күпкә кимрәк”, - дип ассызыклады Айрат Фәррахов.
Республикада вакцинация өчен “Гриппол плюс” вакциналары кайтарыла. Теләгән кешегә француз һәм голланд вакциналары да тәкъдим ителә. Әмма безнең ил вакциналары да составы буенча кимен куймый, дип шәрехләп үтте министр.
Вакцинация тәртибен искәртеп узып, Айрат Фәррахов 15 яшькә кадәрге балалар өчен вакцинаның ата-аналарның язма рөхсәте белән генә кертелергә, аның алдыннан медицина тикшерүе үткәрелергә тиешлеген билгеләп узды. Вакцинация аллергия реакцияләре булганнарга һәм тавык аксымын кабул итә алмаучыларга киңәш ителми.
“Соңгы 6 елда Татарстанда грипптан вакцинацияләү нәтиҗәсендә бер генә өзлегү очрагы да теркәлмәгән”, - дип белдерде министр.
http://tat.tatar-inform.ru/ сайтыннан алынды.