Районның Җәмәгатьчелек Советы бүген үзәк хастаханәнең ашыгыч ярдәм бүлеге эшчәнлеге белән танышты.
Районның Җәмәгатьчелек Советы бүген үзәк хастаханәнең ашыгыч ярдәм бүлеге эшчәнлеге белән танышты. Биредә үз һөнәрләренә тугры булган, курку белмәс, тәҗрибәле шәфкать туташлары эшли. Аларның тиз һәм дөрес беренче ярдәм күрсәтүе аркасында бик күп райондашларыбызның гомерләре озыная. Ак халатлы фәрештәләрнең хезмәтләре хаклы бәяләнәме соң?
Ашыгыч ярдәм хезмәте фельдшерлары фронтның беренче линиясендә эшлиләр. Чакырулар булганда, көтелмәгән хәлләрдә нәкъ менә алар кешеләргә ярдәмгә ашыга. ГЛОНААС ситемасы һәм кәрәзле телефоннардан да аларга элемтәгә чыгалар. Бүлектә 11 фельдшер эшли. Барысы да югары квалификацияле белгечләр, эшләре җиңел түгел. Чакыру белән, өйгә килеп авыруга, мәсәлән, кардиограмма язалар, үзләре шуны укыйлар. Инфаркт-инсульт икәнен шунда ук (!) ачыклап, Чаллыга алып китәләр. Моның өчен бик зур тәҗрибә кирәк. Фәрзия Муллагалиева 25 ел ашыгыч ярдәм бүлегендә эшли. Аңа бу елларда төрле хәлләр белән очрашырга туры килгән:
- Хәзер авырулар яшәрде, яшьләрдә дә инсульт, инфаркт очраклары күп. Гаиләдә низаг килеп чыкканда, психологик киеренкелек вакытында да ярдәм сорыйлар. Кулдан килгәннең барысын да эшләргә тырышабыз. Безгә әллә ни кирәк түгел, авыруларның рәхмәте безгә иң олы бүләк,- ди ул тыйнак кына.
- Иң йөрәк өзгече- юл фаҗигаләрендә машина астына кысылып калган кешеләрне, аеруча балаларны коткару. Шуңа күрә бригадага тагын бер фельдшер булса, артык булмас иде. Аннан соң безгә яллар сирәк эләгә. Сменадан соң ике-өч көн ялың булса да, ярышка, Сабантуйга дежурлыкка чакыралар. Авыруны Чаллыга илтү өчен дә ялдагы фельдшер чакырыла,- ди 29 ел дәвамында халыкка беренче ярдәм күрсәтүче Филара Хәбетдинова.
28 еллык хезмәт стажына ия Филүзә Нугаева райондашларны үз сәламәтлекләренә игътибарлы булырга чакыра:
- Авырулар сәламәтлекләренә җитди карамый, табиб билгеләгән даруларны эчмиләр, шуның аркасында кан басымы күтәрелә дә, безне чакыралар. Даруны даими эчсәләр, инсульт, инфаркт булмас иде. Табиб сүзен тыңларга кирәк. Райондашларга сәламәт тормыш рәвеше белән яшәү дә җитми. Диспансеризация үтәргә, үзеңнең сәламәтлегең дәрәҗәсен белеп торырга кирәк.
Җәмәгатьчелек советы рәисе Зәмфирә Хафизова күп тапкырлар ашыгыч ярдәмгә мөрәҗәгать иткән. Үзебезнең фельдшерларның һөнәрмәнлегенә таң калган ул. Чөнки алар куйган диагноз Чаллы табиблары тарафыннан расланып, авыруга тиз арада дөрес ярдәм күрсәтелгән. Шуның аркасында якын кешесе бүген сау-сәламәт.
- Ашыгыч ярдәм фельдшерлары бар кешене коткара, ярдәм итә. Ә үзләрен кайгыртучы бармы икән? Мине шушы сорау борчый. Кызларның хезмәтләре бүләкләүгә тәкъдим ителмәгән. Аннан соң эш урыннары “проходный двор”! Кеше үтеп-сүтеп йөри торган җирдә утыралар. Үтәли җил уйнап тора. Авыру кабул итәргә урын кечкенә. Тиешле ял күрмичә эшлиләр.
Баш табиб урынбасары Рөстәм Могътазиров быел ашыгыч ышыгыч ярдәм хезмәтенә ике автомобиль-реамобиль кайтуын әйтте. Фельдшерларга киемнәр бирелгән, медикаментлар да җитәрлек. Ә менә фельдшерларга эш урынында тиешле шартлар кайчан тудырылыр? Бу сорау буенча хастаханә җитәкчелеге дә уйлана булып чыкты. Ашыгыч ярдәм бүлеге моннан 9 ел элек(!), 2010 елда төзекләндерелгән. Бүлекне киңәйтү, яки аерым бина булдыру кирәклеге көн кадагына баса. Моның буенча ТР Сәламәтлек саклау министрлыгына ярдәм сорап хат язылган. Хәзер шул ярдәмнең кайтуын көтәләр.
Фельдшерлар да көтә- тик кайчанга кадәр? Шомартылган җавап чоры узып бара.