Республиканың иң яхшы сыер савучысын сайлыйлар
Район савымчылар бәйгесенең җиңүчесе дип табылган “Нива” ҖЧҖ алдынгы сыер савучысы Тәнзилә Миңнуллина бүген үзенең һөнәри осталыгын республика бәйгесендә сынаячак. Сыер савучыларның 41 нче республика бәйгесе 20-21 июнь көннәрендә Питрәч районының ҖЧҖ «Рацин-Шәле» хуҗалыгында уза. Анда район ярышларында җиңү яулаган 44 оператор катнаша.
Бәйге 3 этаптан тора. Теоретик өлештә катнашучылар саву осталыгы һәм сөтнең характеристикасы буенча сорауларга җавап бирәчәк.
Чираттагы этап – саву аппаратларын сүтеп җыю. Биредә конкурсантларның җитезлеге һәм эшләренең сыйфаты бәяләнәчәк.
Өченче өлеш - аппаратны савуга әзерләү һәм савып күрсәтү.
Катнашучыларның осталыгына ТР авыл-хуҗалыгы һәм азык-төлек министрының терлекчелек буенча урынбасары Нәҗип Хаҗипов җитәкчелегендәге конкурс комиссиясе бәя бирәчәк. Җиңүчеләрне диплом һәм кыйммәтле бүләкләр көтә. Бүләкләү тантанасы 21 июньдә булачак.
http://agro.tatarstan.ru/tat/ файдаланып әзерләнде.