Хәйдәр Бигичев истәлегенә багышланган I төбәкара яшь җырчылар һәм фольклор башкаручылар фестиваленнән
10-11 апрель көннәрендә Сарманда Татарстанның халык артисткасы Зөһрә Сәхәбиева исемендәге, Россиянең атказанган артисты Хәйдәр Бигичев истәлегенә багышланган I төбәкара яшь җырчылар һәм фольклор башкаручылар фестивале узды. Әле тәүге мәртәбә генә оештырылуына карамастан, бәйгегә Татарстан районнарыннан гына түгел, чит регионнар - Екатеринбург, Пермь, Пенза, Свердловск өлкәләреннән дә җыр-моңга осталыкта ярышырга теләүчеләр килгән иде.
Фестивальдә барысы 50 ләп җырчы катнашкан, алар арасында безнең Актаныш кыз-егетләре дә булуы бер сөенеч булса, аларның да матур нәтиҗәләр белән кайтуы икеләтә сөенеч. Актаныш сәнгать мәктәбе вокал укытучысы Лилия Мостафина сүзләренә караганда, 11-16 яшьлек кыз малайлар арасында Миләүшә Зәкиева, Ринат Салихов уңышлы чыгыш ясаганнар, Басыйрова Ләйсән исә дипломант исеменә лаек булган. 17-30 яшьлекләр арасында Олеся Мәрдәнова, шулай ук, дипломант исеменә, ә Лилия Хөсәенова мәртәбәле 1 нче урынга ия булдылар.
Бәйгедә катнашучылар һәммәсе дә мәшһүр җырчыларыбыз Зөһрә Сәхәбиева һәм Хәйдәр Бигичевларның җырлары тупланган дисклар, җиңүчеләр исә кыйммәтле бүләкләр белән бүләкләнделәр.